Полиция қызметіне келушілер қатары 4 есе артқан
Полиция органдарында кадрлардың тұрақтау көрсеткіші 42%-ға жетті, деп хабарлайды Almaty-akshamy.kz.
Бұл туралы ҚазАқпарат тілшісінің сауалына жауап берген Ішкі істер министрі Марат Ахметжанов мәлім етті.
«Кадр тапшылығы мәселесін шешу - «Қоғаммен әріптестікте қоғамдық қауіпсіздікті қамтамасыз ету» тұжырымдамасының бір бағыты. Бұл ретте біз жұмысты өзімізден (министрлік – автор түсіндірмесі) бастадық. Полиция органдарына қатысты қабылданған іс-шаралардың арқасында 42%-ға кадр ауыспалылығы тоқтады. Полицияға келемін деген адамдар қатары 4 есе артты. Бұған Президенттің тікелей тапсырмасы әсер етті. Атап айтқанда, қызметкерлердің алатын айлығын өсіру және басқа да көтермелеу шаралары қабылданды», - деп жауап берді ведомство басшысы тілші сауалына орай.
Қоса кетсек, бұған дейін Ашық НҚА порталында жарияланған аталған тұжырымдамада кадр тапшылығы мәселесі өзекті бағыттардың бірі ретінде көрсетілген. Сонымен қатар, полиция қызметкерлерінің жалақысы өскенімен, ол инфляция әсерінен сезілмей отырғаны да айтылған.
