Инвесторларға жаңа салық салынуы мүмкін
Бұл туралы Энергетика вице-министрі Асхат Хасенов мәлімдеді.
Баламалы салық Қазақстанда таусылып жатқан кен орындарын игеріп жатқан инвесторлар үшін енгізілуі мүмкін, деп хабарлайды Almaty-akshamy.kz
Оның айтуынша, игерудің кеш кезеңдеріндегі кен орындарына инвестиция салу үшін 2023 жылы "Жер қойнауы және жер қойнауын пайдалану туралы" ҚР Кодексінде "сарқылатын кен орындары" ұғымы, олардың критерийлері және инвестордың қарсы міндеттемелері енгізілді.
"Ағымдағы жылы осындай кен орындарын (307 мұнай кен орнынан 24) жер қойнауын пайдаланушыларға балама салықты қолдану үшін салық кодексіне түзетулер күтілуде. Бұл реформаны толық іске асыру геологиялық барлауға жыл сайын 200 млрд теңгеге дейін инвестиция салуға, 2045 жылға дейін мұнай өндіруді +60 млн тоннаға ұлғайтуға және ағымдағы жұмыс орындарын сақтауға серпін береді", деді Асхат Хасенов.
Биылғы 7 ақпанда Үкіметтің кеңейтілген отырысында Мемлекет Басшысы Қазақстанның жаңа салық кодексінің жобасын сынға алды. Оның айтуынша, жаңа салық кодексі инвесторлар үшін қолайлы жағдай жасау мен бюджетке түсетін түсімдердің қажетті деңгейін ұстап тұру арасындағы ақылға қонымды теңгерімді қамтамасыз етуі тиіс.
