Түнгі Алматының әсемдігіне көз тоймайды

Түнгі Алматының әсемдігіне көз тоймайды
Суреттер: О.ЖОЛДЫБАЙ

Түнгі шаһардың келбеті көздің жауын алады.

Бүгін әсем қала Алматының керемет түнгі көріністерін суретке тарттық. Күн райы да салқын самалды болды. Серуен құрып, бір сәт демалуға сондай жақсы ауа райы әсер етті дей аламыз. Негізі, байқап қарасаңыз, қалалықтар кешқұрым серуендегенді жақсы көретіндей. Күні бойы жұмыстан бас көтермеген халық кеш түскенде үйлеріне жетеді. Біраз тамақтанып, көшеге сергуге шығады. Сондай азаматтардың қатарында біз де бармыз. Жай жүрмей, көрікті мекендерді суретке түсіріп жүреміз. Бір жағынан, өзімізге жақсы. Көңіл-күйің көтеріліп, бір серпіліп қаласыз. Жұртпен тілдесіп, арасында ойын-сауық құрған жандарды байқайсыз. Енді біреулері ролик теуіп, мәз-мейрам болып жатады. Қол ұстасқан ғашықтар кештің көркіне әр береді. Міне, осылайша түнгі шаһардың келбетіне көз тоймай қарай бергіңіз келеді.

Бұл жолы Республика алаңы жағын араладым. Сондағы тамаша көріністерді, әдемі кадрларды тартуға тырыстым. Жарқыраған қызылды-жасылды шамдар, қабырғалардағы бояулар - бәрі сәтті жарасым тапқан. Негізі көбіміз онша мән бере бермейміз. Алматы - еліміз бойынша ең ірі мегаполис. Тарихы да мың жылдықтарға кетеді. Бір жағынан, осы қалада ғұмыр кешудің өзі бір бақыт деп. Расында солай. Қаншама жандар бұл жерге келіп, қыдырып, аспанмен таласқан тауларды көруге асық. Ал біздер болсақ, сол ғажайып пен керемет сұлулықтың арасында жүрміз.

Жайна, жаса, гүл-Алматы!