Кілемге сурет салатын қазақстандық шебер Париждегі көрмеге қатысты
Парижде 120-халықаралық заманауи өнер көрмесі өтті.
Salon d 'Automne (Cалон д’Отомн) деп аталатын мәдени іс-шарада әлемнің түкпір-түкпірінен келген мыңнан аса әртіс өз туындысын паш етті, деп хабарлайды Almaty-akshamy.kz 24.kz-ке сілтеме жасап.
Өнер кешінде қазақстандықтар да назардан тыс қалмады. Әсел Сабыржанқызының шығармашылығымен әлеуметтік желі қолданушылары жақсы таныс. Жас талант иесі кілем үстіне қылқаламмен сурет салады. Париждегі өнерсүйер қауымға құралақан келмеген. Шебер Ұлы Даланың батыл қыздарын бейнелеген кілем-картинасын көпшілік назарына ұсынды.
«Менің шығармашылығым ел тарихындағы ұлы тұлғаларға арналады. Өзімнің замандастарымды елге еңбегі сіңген кейіпкерлермен таныстырсам деймін. Сол себепті туындыларымды әлем деңгейінде жарыққа шығарғым келеді», - дейді суретші Әсел Сабыржанқызы.
Көрме басшылығы Әселдің көзтартар туындыларына ерекше қызығушылық танытты. Сол себепті келушілердің көз алдында Франция саясаткері әрі гуманист Симон Вейльдің портретін бейнелеуін өтінген. Ал картина Париж көрмесіне табысталады.
«Бұл көрмеге кез келген ел суретшілерінің қатысу мүмкіндігі бар. Бастысы, оған тіркелудің жолдарын білсе жеткілікті. Қазақстандық қылқалам шеберлеріне ерекше басымдық берген себебіміз, енді олар да біздің салон жайында біліп, көрмеге қатыса алады. Бұл әр елдегі шығармашылық иелерін бір арнаға тоғыстыратын мазмұнды іс-шара деуге болады», - Salon D’Automne халықаралық көрмесінің президенті Жиль Гийом.
20-ғасырдың басында қалыптасқан Salon d’Automne көрмесі әу баста классикалық жанрдағы туындыларға ғана арналған. Онда жаңа идеялар айтылып, түрлі бағыттар дәріптелді. Матисс, Сезанна, Модильяни сынды әлемге әйгілі суретшілердің шығармалары көпшілік назарына ұсынылды. Бұл жолы бағдарлама аясында қазақстандық сән көрсетілімі ұйымдастырылады. Сондай-ақ Алла Ильчунге арналған кітап пен фильмнің тұсауы кесіледі.
