Қазақстан Еуроодақ елдеріне бал экспорттайды
Ара ұясына арналған маусымдық норматив - 5 мың теңге.
Еуроодақ сарапшылары Қазақстан тарапымен бірлескен жұмыс жүргізуде, деп хабарлайды Almaty-akshamy.kz АШМ баспасөз қызметіне сілтеме жасап.
ЕО сарапшылары Ветеринариялық бақылау және қадағалау комитетінің қызметкерлерімен және Қазақстан Республикасы Ауыл шаруашылығы министрлігінің ведомстволық бағыныстағы ұйымдарымен бірлесе отырып, бал экспортына ЕО талаптарын нақтылау және енгізу бойынша жұмыс жүргізуде.
Тараптар бал қалдықтарын бақылаудың ұлттық жоспарын дайындау үшін миссия жоспары мен құжаттаманы талқылады. Іс-шара аясында қатысушылар зертханаларға барып, workshop өткізді. Сонымен қатар, жоспардың іске асырылуын талқылау үшін бал өндірушілер шақырылды.
2023 жылдың сегіз айында Қазақстан 22 тонна бал экспорттады. Оның ішінде Сауд Арабиясына - 11,9 тонна, Қырғызстанға - 5 тонна, Иорданияға - 1,3 тонна. Сондай-ақ, отандық бал Қытайға, Түркияға, Ресейге, Моңғолия және Гонконгқа жіберілді. 2022 жылы өндіріс 3 910,7 тоннаны құрады. Бал өндірісінің негізгі үлесі ШҚО (1833,1 тонна), Алматы (254,5 тонна), Павлодар (416,7 тонна), Түркістан (219,9 тонна), Абай (371,2 тонна) және Жетісу (293,6 тонна) сияқты өңірлерге тиесілі.
Өнімнің қауіпсіздігіне келетін болсақ, "Ветеринария жөніндегі ұлттық референттік орталық" балға мониторингтік зерттеулер жүргізеді. Экспорт және импорт кезінде өңірлік филиалдар "Республикалық ветеринариялық зертхана" зертханалық зерттеулер жүргізеді. Олар ластаушы заттардың (антибиотиктердің, пестицидтердің) қалдық мөлшерін және уытты элементтердің (ауыр металл тұздарының) шекті рұқсат етілген шоғырлану мөлшерін анықтайтын болады.
Сонымен қатар, Қазақстанда омарташылар үшін бал ара ұяларымен асыл тұқымдық және селекциялық жұмыстарды жүргізуге субсидия ретінде мемлекеттік қолдау бар. Ара ұясына арналған маусымдық норматив - 5 мың теңге. 2023 жылы жергілікті атқарушы органдар субсидиялауға 422,5 млн теңге бөлді, ал бір жыл бұрын бұл сома 370,3 млн теңгені құрады.
