Елімізде жыл сайын 13 мыңнан астам адам қатерлі ісіктен көз жұмады
Жыл сайын 37 мыңнан астам қатерлі ісік тіркеледі.
Астанада протон терапиясын жүргізетін онкологиялық орталық ашылады, деп хабарлайды Almaty-akshamy.kz Үкіметтің баспасөз қызметіне сілтеме жасап.
Премьер-министр Әлихан Смайылов Қазақстанда алғаш рет ашылатын заманауи медициналық орталықта болды.
"Жағдайды жақсарту үшін біз Астанада онкологиялық орталық құрып жатырмыз. Бұл – күрделі нысан", - деді Әлихан Смайылов.
Бюджеттік инвестициялық жобаны жүзеге асыру үшін Швейцария мен АҚШ-тан жетекші халықаралық компаниялар тартылған.
"Бүгінгі таңда құрылыс жұмыстары 90%-ке аяқталды, атап айтқанда, сәулелік және ядролық медицина орталықтары, протондық терапия орталығы, әкімшілік және техникалық блоктары бар 210 төсектік емдеу-диагностикалық корпус салынды", - делінген хабарламада.
Медициналық мекеменің корпустары қалалық инженерлік су, жылу және электрмен жабдықтау желілеріне қосылған. Ғимараттарда кабинеттер мен палаталарды әрлеу жұмыстары аяқталды.
Ұлттық ғылыми онкологиялық орталықтың басшысы Санжар Шалекенов мекемеде жылына 6 мың пациентке радионуклидтік диагностика жүргізу, радиофармпрепараттар шығару және радионуклидтік терапия жүргізу жоспарланғанын айтты.
"Бізде радио-сәулелік емдеу жүргізетін бес аппарат бар: біреуі контактілі сәулелік терапияға, екіншісі контактісіз емдеуге арналған", - деді ол.
Ұлттық ғылыми онкологиялық орталықта протондық орталық жұмыс істейді. Жылына 800-1000 сырқат ем алады.
"Онкогематология орталығы да қарастырылған. Мұнда сүйек кемігін трансплантациялауға арналған 15 төсек бар. Бұл мүлдем стерильді, таза. Мұнда жылына 180-ден 200-ге дейін трансплантация жасау жоспарланып жатыр", - дейді Санжар Шалекенов.
Оның айтуынша, бұл республикадағы науқастардың үштен бірін емдеуге мүмкіндік береді. Ал екінші ғылыми-білім беру орталығы болады. Онда 140 төсектік стационар, үш операциялық зал және үлкен диагностикалық емхана орналасады.
Медициналық жұмыс жөніндегі орталық басшысының орынбасары, онколог-хирург Әділбек Мұқажанов протондық терапияны орындауға мүмкіндік беретін бірегей цикротрон аппараты туралы айтып берді.
"Бұл Қазақстан мен Орталық Азиядағы протон терапиясы жүргізілетін жалғыз орталық болады. Әлемде мұндай орталықтар 100-ден аспайды. Олардың бірі бізде", - деді ол.
Оның айтуынша, циклотрон протон сәулелерін шығарады және екі емдік толқын деп аталады, соның арқасында екі науқасты бір уақытта сәулелендіруге болады.
"Бұл протон терапиясының ерекшелігі - фотонды сызықтық үдеткіштерден айырмашылығы, мұнда сәулелену дәл және жұмсақ болады. Бұл әсіресе балалар мен әлсіреген науқастарды емдегенде өте маңызды рөл атқарады", - дейді Әділбек Мұқажанов.
Әлихан Смайылов денсаулық сақтау министрлігіне бас мердігермен бірлесіп, 2024 жылдың 1 тамызына дейін протонды терапия орталығын іске қосумен нысанды пайдалануға беруді тапсырды.
