Екпе алған студенттер мен оқытушыларға қандай жағдай жасалмақ?
Вакцина алған оқытушылар қосымша ақы немесе ақылы демалыс алады.
Қазақстандық жоғары оқу орындары ҚР Білім және ғылым министрі Асхат Аймағамбетовтің тапсырмасы бойынша жоғары оқу орындарының білім алушылары арасында вакцина салуды қолдау акциясын бастайды, деп хабарлайды Almaty-akshamy.kz.
ҚР Білім және ғылым министрлігінің баспасөз қызметі таратқан мәліметке сәйкес, COVID–19 індетіне қарсы екпе алған студенттер жоғары оқу орындарының мүмкіндіктеріне байланысты оқуға, жатақханаларда тұруға жеңілдіктер алып, түрлі сыйлықтарға ие болады.
Осылайша, жоғары оқу орындары халықтың денсаулығын қорғау үшін вакциналау қарқынын күшейту жөніндегі жұмысты қолдайды. Тек студенттер ғана емес, сонымен қатар жоғары оқу орындарының екпе салдырған оқытушылары да материалдық материалдық ынталандыруға ие болады.
Әл-Фараби атындағы ҚазҰУ, Л.Н. Гумилев атындағы ЕҰУ, Абай атындағы ҚазҰПУ, Қ.И. Сәтбаев атындағы ҚазҰТЗУ, М. Әуезов атындағы ОҚУ, М. Өтемісов атындағы БҚУ, Х. Досмұхамедов атындағы Атырау университеті вакциналауды қолдау бойынша акцияларды бастап кетті.
Бірқатар жоғары оқу орнының студенттері үшін оқуға, жатақханаларда тұруға жеңілдіктер, сауықтыру шипажайларына тегін жолдамалар, тегін тамақтану және қоғамдық көлікті пайдалану талондары қарастырылған.
Сондай-ақ жоғары оқу орындары вакцина алған студенттер үшін шет тілдері, компьютерлік сауаттылық және кәсіпкерлік дағдыларды дамытатын тегін курстар ұйымдастыруды жоспарлап отыр. Сонымен қатар екпе салдырған кейбір университеттердің студенттері фитнес залдарына, бассейнге, театрға, кинотеатрға және концерттерге тегін бара алады.
Аталған жоғары оқу орындарының оқытушылары да назардан тыс қалмады. Вакциналанған оқытушылар қосымша ақы немесе ақылы демалыс алады.
«Жоғары оқу орындарын коронавирустың елде таралуы алаңдатып отыр. Вакцинация мәселелері мен оның шешілу жолдарын жоғары оқу орындарының өздері қабылдайды. Министрдің тапсырмасы бойынша жоғары оқу орындары студенттер мен оқытушыларды вакцина алуға шақырып, ынталандыру шараларын қабылдап жатыр. Бұл акция біздің азаматтардың санасын оятуға көмектеседі деп сенеміз. Біз бірлесе отырып, қауіпті вирусты жеңе аламыз және карантин мүмкіндігінше тез аяқталады деп үміттенеміз. Басқа жоғары оқу орындарын да вакцина салуды қолдау үшін ынталандыру шараларын ұйымдастыруға шақырамыз. Себебі бұл коронавирустың таралуын тоқтатудың жалғыз жолы», – деп атап өтті Білім және ғылым вице-министрі Қуаныш Ерғалиев.
