Алматыда тауда қалып қойған туристер құтқарылды
Қар көшкіні түсіп, бір турист төменге қарай сырғып түскен.
Алматылық құтқарушылар қар көщкен кезде тауда болған туристерді аман алып қалды, деп хабарлайды Аlmaty-akshamy.kz ҚР Төтенше жағдайлар министрлігінің баспасөз қызметіне сілтеме жасап.
Баспасөз қызметінің мәліметтеріне қарағанда, 2023 жылғы 1 сәуірде сағат 16:35-те ТЖМ Республикалық жедел-құтқару жасағының кезекші-диспетчерлік бөлімшесіне Алматы қаласы ТЖД жедел кезекшісінен шақыру келіп түскен.
Үш адам Бутаков асуынан Букреев шыңына көтеріліп бара жатқан уақытта қар көшкіні жүріп, бір турист төменге қарай сырғып түскен. Осыған байланысты бес адамнан тұратын Республикалық жедел-құтқару жасағының құтқару тобы көмекке аттанды. Сонымен қатар, адамдарды іздеуге Алматы қаласының Құтқару қызметінің құтқарушылары қосымша жіберілді.
Республикалық жедел-құтқару жасағының кезекшісі оқиға орнының локациясын жіберген өтініш берушімен байланысқа шықты. Ол туристік маршрут бойынша тауға көтерілу кезінде қар көшкіні салдарынан жолдастарынан қалып қойған. Ешқайда жүрмей, құтқарушылардың көмегін күткен. Туристермен ұялы байланыс арқылы байланысқа шыққан құтқарушылар сағат 18.43-те зардап шеккендермен визуалды байланыс орнатқан.
20 минуттан кейін РЖҚЖ құтқару тобы туристерге жетіп, зардап шеккендерді төменге түсіру жұмыстарын бастады. Сағат 19:55-те туристерді төмен түсіру жұмыстары аяқталды, құтқарушылар оларды Бутаков шатқалындағы автотұраққа дейін жеткізді. Адамдарға медициналық көмек қажет болмады.
ТЖМ құтқарушылары тауда қалған туристерге барлық қауіпсіздік шараларын сақтауға кеңес береді. Тауға шыққан кезде өз күшіңізді есептеңіз, құтқару қызметтерінің ауа райы жағдайлары, көшкін қаупі деңгейі туралы ұсыныстарын ескеріңіз, таудағы серуенге өзіңізбен бірге пауэрбанк, су өткізбейтін пакеттегі сіріңке, су, қосымша жылы киім-кешек, GPS навигаторы, т.б қажетті заттарды ала шығыңыз .
«Егер сізге көмек қажет болса, 112 немесе 8(727) 372-15-60 (ТЖМ Республикалық жедел-құтқару жасағының кезекші-диспетчерлік бөлімшесі) қоңырау шалыңыз», - делінген хабарламада.
