Сыраға сұраныс 13 пайызға төмендеген
2023 жылдың қаңтар-желтоқсан айларында қазақстандық сыра қайнатушылар 611,2 миллион литр сыра өндірген. Сәйкесінше, 2022 жылмен салыстырғанда 14,8%-ға аз. 2021 жылы сыра өндірісі 15,4%-ға қысқарып, рекорд орнаған болатын.
Биылғы қаңтарда 29 миллион литр сыра өндірілген. Бұл 2023 жылдың қаңтарымен салыстырғанда 34,8 пайызға аз, деп хабарлайды аlmaty-akshamy.kz.
2023 жылғы қаңтар-желтоқсанда қазақстандық сыра қайнату зауыттары сыраға сұраныстың 89,8%-ын, 2022 жылы 92,4%-ын қамтамасыз еткен. Қазақстан Республикасына импортталған сыраның көлемі бірден 17,3%-ға, 69,6 млн литрге дейін өскен. Осылайша, импорт үлесін 7,6%-дан 10,2%-ға дейін ұлғайтты.
Сыра экспорты 20,2 млн литрді құрап, 2,8%-ға қысқарған. Ал ішкі нарықтағы сатылым 12,6%-ға, яғни 660,5 млн литрге дейін төмендеген.
Ал, Республикалық психикалық денсаулық ғылыми-тәжірибелік орталығының мәліметінше, Солтүстік Қазақстан, Абай, Павлодар және Шығыс Қазақстан облыстары сыраны ең көп ішетін өңірлер ретінде тіркелсе, ең аз ішетін өңірлер ретінде – Алматы, Маңғыстау және Алматы облыстары. Барлығы 90,4 мың қазақстандық ішімдік мәселесіне байланысты есепте тұр.
2024 жылдың қаңтар айының соңында алкогольдік сыраның бағасы 0,4%-ға өскен. Өткен жылдың желтоқсан айында бұл сусын 1,3%-ға, ал 2023 жылдың қаңтарында 2,9%-ға қымбаттаған.
Қазақстан Республикасының өңірлері арасында алкогольдік сыра бағасының ең жоғары жылдық өсімі Ақмола облысында байқалған. Одан кейінгі орында Ұлытау және Маңғыстау облыстары болса, Павлодар, Түркістан және Жамбыл облыстарында ең арзан баға тіркелген.
