Қазақ сатиригінің кітабын түріктер таласа сатып алып жатыр
Түркияның Ыстамбұл қаласында дәстүрлі Үмрание кітап көрмесі өтті.
"Қайыршының миллиардер досы" атты хикаят Түркияда үлкен сұранысқа ие болып, жазушыға арнайы шақырту жіберілген. 100-ге жуық қазақ жазушысының еңбектерін түрік тіліне аударған Ашур Өздемір кітаптың жеңіл аударылғанын, қоғамдағы өзектілігін тілге тиек етті. Хикаяттың тілінің жатықтығы сонша өз оқырманын тауып үлгергенін айтады. Ащы сарказммен, уытты тілмен өрнектелген повеске сұраныс жоғары. Баса айта кетер бір жайт, бұған дейін шығармалары алты тілге аударылған Қанағат Әбілқайырдың "Қайыршының миллиардер досы" атты хикаяты таяуда ағылшын тілінде жарық көреді деп күтілуде. Мың данамен шыққан кітаптың тұсауы осыдан үш жыл бұрын кесілген. Түрлі жанр тоғысқан туындыны парақтай отырып, қазіргі күннің шынайы келбетін көре аласыз. Хикаятта қағанағы қарқ қалталы байлардың, әсіре астамшылығы мен қарапайым халықтың дәрменсіздігі сөз болады, деп жазды КТК.
"Арнайы шақырған себебі, былтыр Ашур Өздемір деген ағамыз менің «Миллиардердің қайыршы досы» деген кітабымды түрік тіліне аударған. Басылып шыққаннан кейін сұраныс жақсы болыпты. Кітап жақсы өтіпті. Насихаты жақсы болыпты. Біздегі сияқты жай ғана кітап дүкендері ғана емес, оларда кітаптарды сайттарда, біздегі интернетте сатқан сияқты сатады екен. Сол арқылы туынды жақсы өтіп жатыр, Сізді кітап көрмесіне шақырамыз деп хабарласты", -деді жазушы Қанағат Әбілқайыр
