Қанатымен су сепкен қарлығаштай...

Қарулы күштердің әскери қызметшілері Абай облысында болып жатқан өртпен күресуді белсенді жалғастырып келеді. Армиялық авиацияның ұшқыштары маусымның 8 мен 13 аралығында жанып жатқан өртке 3500 тоннадан аса су төкті. Қалыптасқан жағдайды ескере отырып, Қарулы күштердің 600 әскери қызметшісі мен 50 бірлік техника Шүлбі, Талица, Озерки, Жерновка және Барышевка учаскелеріндегі тілсіз жаумен күреске тартылған.

Жағдайды әуеден бақылау үшін үш ұшқышсыз ұшу аппараты қолданылуда.
Төтенше жағдайлар министрлігінің өрт сөндіруші есептоптары мен «Шығыс» өңірлік қолбасшылығының бөлімшелеріне армиялық авиация әуеден қолдау көрсетуде. Іс-қимылын «Шығыс» өңірлік қолбасшылығы жедел штабының 12 әскери қызметшісі үйлестіріп отыратын 3 арнайы топ жұмыс істеуде.

– Қолданыстағы нормаға сәйкес әр экипаждың ауысымы төрт сағатқа созылады. Осы уақыт ішінде тікұшақтар 30-35 рет су төгеді. Бұл орта есеппен 100 тонна су, – деген статистиканы келтіреді 30131 әскери бөлімі командирінің орынбасары подполковник Руслан Юмашев.
69 адамнан тұратын 23 ұшу экипажы нақты және үйлесімді әрекет етуде. Мәселен тікұшақтан жеке дара су төгу әдетте тиімсіз. Бұл бір ошаққа үш тонна ғана су деген сөз. Егер алты тікұшақпен ұшса бір мақсатта жұмыс істейді. Кейде 40 секундта бір жерге 30 тонна су төгуге болады.
Ұшқыштардан кейін ТЖМ-нің жердегі өрт сөндіруші есептоптары жалынды ауыздықтауда. Олардың соңын ала Абай гарнизонының әскери қызметшілері іске кіріседі. Әскерилер жанып жатқан ағаштарды құлатып, бықсыған отты өшіріп жатыр.
Жұмыс күндіз-түні тоқтамай жүруде.

Сондай-ақ әскери қызметшілердің дер кезінде тамақтануы мен демалып күш жинауына уақыт бөлінген.

Ауқымды апат аймағында қарулы күштердің барлық бөлімшелерінің іс-қимылын үйлестіруді Қорғаныс министрі генерал-полковник Руслан Жақсылықов жүзеге асыруда. Төтенше жағдайлар министрлігінің жедел штабымен, жергілікті әкімшілікпен бірлесіп, ол өртке қарсы іс-шараларға қатысатын жеке құрамның міндеттерін айқындауда.