"Отбасы банк" ұлттық институтқа айналмақ

Оның негізгі міндеті республика бойынша азаматтарды тұрғын үймен қамтамасыз ету бойынша тұрғын үй қатынастарын дамыту болады.

"Отбасы банкін" екінші деңгейдегі банктер жүйесінен шығарып, оған тұрғын үйді есепке алу, қою және бөлуді орталықтандыратын ұлттық даму институты мәртебесін беру жоспарланып отыр, деп хабарлайды Almaty-akshamy.kz

Бұл туралы Индустрия және инфрақұрылымдық даму вице-министрі Еркебұлан Дауылбаев айтты. 

Бұл ретте Бәсекелестікті қорғау және дамыту агенттігі мен Ұлттық Банк кейбір мәселелер бойынша (мысалы, қаржылық қызметтерді тұтынушылардың құқықтарын қорғау мәселелері бойынша бақылау мен қадағалау) жұмыс жүргізе береді. 

«Отбасы банк Қазақстан Республикасының заңнамасында айқындалған, депозиттерді қабылдау, заңды және жеке тұлғалардың банктік шоттарын ашу және жүргізу, кассалық операциялар, банктік қарыз операциялары, салымшыларға тұрғын үй, аралық және алдын ала тұрғын үй қарыздарын беру сияқты банктік және басқа да операцияларды агенттіктің лицензиясынсыз жүзеге асыратын болады», - деп жалғастырды Дауылбаев. 

Жаңа механизмге сәйкес, әкімдіктерде кезекте тұрғандардың базасы "Отбасы банкіне" беріледі және онда есепке қою тоқтатылады.

«Отбасы банк базасында тұрғын үймен қамтамасыз ету орталығы құрылады, оған тұрғын үйге мұқтаж барлық азамат енгізіледі. Әрбір өтінімге отбасының табысын, мүлкі мен активтерін ашатын цифрлық портреті қалыптастырылады», - деп түсіндірді ИИДМ өкілі.