Қазақстанда бірінші қазаннан бастап тұмауға қарсы вакцинация басталады

Бюджет есебінен тұмауға қарсы вакцинаның 2,3 млн дозасы сатып алынған.

Денсаулық сақтау вице-министрі - ҚР Бас мемлекеттік санитарлық дәрігері Айжан Есмағамбетова ОКҚ кулуарында халықты тұмауға қарсы вакцинациялау науқаны қашан басталатынын айтты, деп хабарлайды Almaty-akshamy.kz Egemen.kz сілтеме жасап.

Айжан Есмағамбетова 1 қазаннан бастап елде тұмауға қарсы вакцинация науқаны басталатынын еске салды.

«Жыл сайын эпидемиялық маусымның басталуына дейін біз вакцинация науқанын өткіземіз. Осылайша адамдардың иммунитеті нығая түседі», - деді вице-министр.

Айжан Есмағамбетованың мәліметінше, бюджет есебінен тұмауға қарсы вакцинаның 2,3 млн дозасы сатып алынды. 20-25 қыркүйекке дейін вакциналарды аймақтарға бөліп жеткізу аяқталады.

Келесі санаттағы адамдар бюджет қаражаты есебінен егіледі:

• жиі ауыратын балалар;
• диспансерлік есепте тұрған балалар;
• 60 жастан асқан, жабық медициналық-әлеуметтік мекемелердегі адамдар;
• жүкті әйелдер.

«Тұрғындар өз қаражаты есебінен екпе салдыра алады. Орташа алғанда, өткен жылғы баға айтарлықтай өзгерген жоқ. Былтыр бұл шамамен 3 мың теңге болатын, биыл біз жеке секторда бұл вакцинаның қанша тұратынын әлі білмейміз», - деп толықтырды Айжан Есмағамбетова.