Түрксіб ауданында биыл төрт мектептің құрылысы басталады
Әкімдік ауданның әлеуметтік инфрақұрылымын дамытуға ерекше назар аударуда.
Түрксіб ауданыда құрылыс қарқынды жүріп жатыр. Бұл туралы Алматы әкімі Ерболат Досаев аудан тұрғындарымен өткен кездесуде айтты, деп хабарлайды Almaty-akshamy.kz.
«Сондықтан біз жаңа мектептер салу және қолданыстағы мектептерді кеңейту жұмыстарын жалғастыруға ниеттіміз. Өткен жылы «Қайрат» шағын ауданында 1 500 орындық №211 мектеп-гимназия салынды. Ол биыл қыркүйек айында жұмысын бастайды», - деді қала басшысы.
2022 жылдың желтоқсанында қолданыстағы ғимаратты (860 орын) сейсмикалық күшейтіп және 300 орынға қосымша құрылыс салып, №59 мектеп-гимназияның ғимаратын реконструкциялау басталды. Жұмыстарды 2024 жылдың І-ші тоқсанында аяқтау жоспарланған.
«Жайлы мектеп» ұлттық жобасын іске асыру аясында осы жылдың IІI-ші жартыжылдығында Түрксіб ауданында 6100 орындық 4 мектептің құрылысы басталады.
Сонымен қоса 2 мектепке 1050 орындық қосымша құрылыс салу (№195 орта мектепке 450 орындық, аяқталуы – осы жылдың тамыз айы және №198 орта мектепке 600 орындық, аяқталуы – осы жылдың қыркүйек айы), №83 гимназия филиалын реконструкциялау (аяқталуы – 2023 жылдың қазан айы) және №50 мектеп ғимаратын сейсмикалық күшейту (аяқталуы - 2023 жылдың желтоқсан айы) жобалануда.
Осы жылдың наурыз айынан бастап қолданыстағы ғимараттарды бұзып, Алматы телекоммуникация және машина жасау колледжін салу үшін жобалау-сметалық құжаттама әзірленуде. Жобалау-сметалық құжаттама әзірлеуді 2024 жылдың І-ші тоқсанында аяқтау жоспарланған.
№70 бөбекжай-балабақша ғимаратын сейсмикалық күшейту жұмыстары аяқталып келеді. Осы жылдың шілде айында ашуды жоспарлап отырмыз. Жыл соңына дейін «Қайрат» шағын ауданындағы 260 орындық мемлекеттік балабақшаның құрылысы аяқталады.
Осы жылдың ІІІ-ші тоқсанында жер учаскесі алынғаннан кейін «Әлмерек» шағын ауданында 320 орындық балабақша салу үшін жобалау-сметалық құжаттама әзірлеуге конкурс жарияланады.