Қызыл кітапқа енген қызғалдақ гүлдеді
Қызғалдақтың 18-і Қазақстанның Қызыл кітабына енгізілген.
Барсакелмес қорығында Борщов қызғалдақтары гүлдеді, деп хабарлайды Almaty-akshamy.kz
Барсакелмес Қызылорда облысының Арал ауданында орналасқан.
ҚР ЭТРМ Орман шаруашылығы және жануарлар дүниесі комитеті таратқан мәлімет бойынша, Борщов қызғалдағы Барсакелмес қорығында гүлдеді.
"Әлемде қызғалдақтың 3000-ға жуық түрі бар. Біздің елімізде 35 түрі өседі, 18-і Қазақстанның Қызыл кітабына енгізілген, оның ішінде Борщов қызғалдағы да бар", - делінген ҚР ЭТРМ Орман шаруашылығы және жануарлар дүниесі комитетінің ақпаратында.
Бұл қызғалдақ – ресейлік ботаник Илья Григорьевич Борщовтың есімімен аталған Арал теңізі өңірінің эндемигі. Аталмыш қызғалдақ түрі Барсакелмес қорығында көптеп кездеседі, сәуір-мамыр айында гүлдеп, мамыр-маусым айларында жемістенеді. Жемісі – үш ұялы көп тұқымды қауашақ.
