Алматының бейнебақылау жүйесіне тұлғаларды тану қызметі енгізіледі
"Алматы қаласын 2025 жылға дейін дамыту және 2030 жылға дейінгі орта мерзімді перспективалар бағдарламасында" күні бүгінге дейін бейнебақылаумен қамтылмаған әлеуметтік объектілерде 7 мыңға дейін бейнебақылау камераларын орнату қарастырылған. Бұл жұмыс келушілер мен қызметкерлердің қауіпсіздігін қамтамасыз ету мақсатында жүргізіледі деп хабарлайды almaty-akshamy.kz
Бұдан басқа, есепке алынған және жоғалған адамдарды іздеу кезінде жедел әрекет ету, әуежайда, вокзалдарда және адамдар көп жиналатын жерлерде қауіпсіздікті қамтамасыз ету үшін 2026 жылдан бастап барлық бейнебақылау жүйелеріне бейнеаналитика және тұлғаларды тану функциясы интеграцияланатын болады.
2027 жылға қарай бейнебақылау жүйесі Алматы полиция департаментінің жедел басқару орталығына бейне суретті шығара отырып, террористік тұрғыдан осал барлық объектілер мен көппәтерлі тұрғын үй кешендерінің аулаларында камералар орнату есебінен кеңейтілетін болады, бұл түтінді, отты, қалдырылған заттарды тану және оларға жедел ден қою сияқты ықтимал қатерлердің болуын қадағалауға мүмкіндік береді.
Алматыны дамыту бағдарламасына сәйкес, 2025 жылға дейін адамдар көп жиналатын жерлерде "SOS дабыл түймесі" шұғыл аудио/бейне қоңырау жүйесін орнату аяқталады, бұл жасалған заңсыз әрекеттерге жедел ден қоюға, сондай - ақ кезекші полиция қызметкерін бейне және аудиобайланыс арқылы дереу қосуға мүмкіндік береді.
Қала құрылысы аясында қауіпсіздік мәселелерін шешуде түрлі көзқарасты болдырмау және қолайлы және қауіпсіз көшелерді қалыптастыру процесінің тиімділігін арттыру үшін 2030 жылға дейін көшелерді кешенді реконструкциялау тәсілі – жарық, бейнебақылау, жаяу жүргіншілер аймағы, дренаж, көгалдандыру және велосипед жолы енгізілетін болады.
Көліктік микромобильді инфрақұрылымды салу үшін көшелердің геометриясы өзгертіледі, бұл оларды жөндеу жобасын жасауға мүмкіндік береді, оның аясында проблемалар бірден шешілетін болады: қаланың ескірген жасыл қоры мен нөсер желісін жаңарту, халықтың мүмкіндігі шектеулі тобы үшін кедергісіз орта құру, Алматы жолдарындағы апатты төмендету үшін Vision Zero тұжырымдамасының элементтерін енгізу.
