471 шам орнатылып, 749 LED-шам ауыстырылды
Алматының Әуезов ауданында 42 шақырым астам электр кабель желілері жаңғыртылады
2024 жылы Алматы қаласының Әуезов ауданында инвестициялық бағдарламалар аясында 25 шақырым электрмен жабдықтау желілерін және 23 трансформаторлық және 1 тарату қосалқы станциясын жаңғырту жоспарланған. Бұл туралы қала әкімі Ерболат Досаев аудан тұрғындарымен кездесуде мәлімдеді.
«Сапалы инженерлік инфрақұрылыммен қамтамасыз ету біз үшін негізгі бағыттардың бірі. Былтыр тұрғындарды тұрақты электр қуатымен қамтамасыз ету бойынша жұмыс атқарылды. 30 шақырым электр беру желілері ауыстырылды, 17 трансформаторлық және 69 тарату подстанциясы модернизацияланды», - деді қала басшысы.
Аудан әкімдерінің өкілеттіктерін кеңейту мақсатында жарық желілеріне қызмет көрсету жұмыстары әкімдердің құзыретіне берілді. Өткен жылдың қараша айында Әуезов ауданының әкімдігі «Алматы Қала Жарық» мекемесімен шарт жасасты. 3 айдың ішінде 9,5 шақырым кабель желісі ауыстырылды, 471 шам орнатылды, 749 LED-шам ауыстырылды және 263 шам жөнделді.
«Биыл 42 шақырымнан астам кабель желілері жаңартылып, 5 мыңнан астам жарық шамдарын LED-шамдарға ауыстыруды жоспарлап отырмыз. Әуезов ауданын сапалы жарықпен толық қамту үшін осы наурыз айында 81 сыртқы жарық желісін салу үшін жобалау-сметалық құжаттаманы әзірлеу басталады», - деді Ерболат Досаев.
