Жандүние жадырауды қалайды

Жақсылықтан жан рахат табады

Жантану ілімінде «Жүрек жылы сөз естігенде тынығады» дейді. Қандай ғажап айтылған сөз. Мұның астарында бірқанша ойлар тұнып жатыр. Адам баласына бұл ғұмырда көп нәрсе керек емес. Басты қажетті қағида осы. Біздер «Жақсылықтың ерте кеші жоқ» деген ойдың түбін қозғауды құп көрдік.

Жақсылық жаршысы. Үлкендер әрдайым игі іс істегеуге үйретіп бағады. Бұл біздің сонау атадан балаға мұра болып қалған дәстүріміздей. Әр білгенін, өмірден көргенін өзінің артына үлгі-өнеге ретінде айтып отырған. Сонымен қатар әр баласына сынай қараған. Соның ішінде кісінің ала жібін аттамауға үйреткен. Сыпайы, мейірімді, рухты азамат болып өсуге баулыған. Бұл - қазақтың сан ғасырлық тәлім-тәрбиесінің көрінісі. Сонымен қатар «жасалған ұлы істің қайырлы боларына» сенген. Бағамдап қарар болсаңыз, ол солай да болған.

Жан рахаты – жылы сөзде. Қытай ойшылы Конфуций «ақыл айту оңай, соны жүзеге асыру қиын» депті. Шынымен де, осы аталған қасиеттерді дағдыға айналдырсақ, рахатқа бөленеміз. Бәрі қарбаласып тұрған шақта осындай рухани құндылыққа көңіл бөлсек, озғанымыз болар еді. Тым құрығанда кісіге жылы сөз арнап, қуатты жігер берсек, сіз де, ол да ұшпаққа шыққандай сезінеді. Осының кілтін іздеудің қажеті жоқ. Бұл – қарапайымдылықтың бір белгісі.

Түйін. Психоанализ ілімінің негізін салушы Зигмунд Фрейд «Әр адамның түйсігінде ешкімге айтпайтын тілек-арманы болады. Кейде өзі де мойындамайтын тым құпия қалауы болатыны рас» депті. Ғалымның сөзінде мән-мағына тұнып жатыр. Жоғарыдағы біршама ойлар осы пікірмен үйлеседі. Айтарымыз, жаныңыз әрдайым жадырап жүрсін!