«Үш терезеден» табиғатқа үңіліңіз
Алматыда өнердің төл өкілі Нұршидин Баратовтың «Үш терезе» атты жеке көрмесі ашылды.
Оған жыл мезгілдері пейзаждары, қала және ауыл мотивтері, натюрморт және теңіз көріністерін қамтитын тақырыптық топтарға топтастыруға болатын 100-ге жуық туындысы қойылған.
«Әр суретшінің шығармашылығында оған жақын тақырыптар, жанр және орындау техникасы бар. Нұршидин Баратов үшін бұл пленэрлік пейзаждық кескіндеме. Табиғаттың өзгермелі, тез өзгеретін тірі ортасы суретшіні баурап алады, одан алынған әсер оның шығармашылығының объектісіне айналады. Оның қала пейзаждарында біз әрқашан белгілі бір орынды тани алмаймыз, бірақ біз өзімізді сол жерде болғандай сезінеміз, қар басқан тозығы жеткен үйді, тыныш және шуақты аулаларды немесе қыркүйектің жылы күндерін жақсы білеміз, оның гүлденген ағаштарына тамсанамыз. Оның шығармаларына қарап отырып, көрермен еріксіз сағыныш сезімін, ерекше көңіл-күйді сезінеді. Әрбір этюд ерекше әлем іспетті, онда көрермен еске алуды, бір сәттің күйін де, шексіз қиял әлемін де аша алады», – дейді көрме кураторы Айжан Қалшора.
Нұршидин Баратов Алматының тумасы. Н.В.Гоголь атындағы көркемсурет училищесін тәмамдаған, содан кейін Т.Жүргенов атындағы Қазақ ұлттық өнер академиясына монументалды кескіндеме бөліміне түсіп, кейін Ыстамбұлда Мимар Синан атындағы бейнелеу өнері университетінде оқуын жалғастырды. Суретші түрлі елдерге көп саяхаттап, Қырғызстан, Өзбекстан, Беларусь, Түркия, Испанияға бірлескен пленэрлерге барды. Ресейдің Ульяновск қаласында А.А.Пластовтың 130 жылдығына арналған мерейтойлық пленэрге қатысқан. Оның картинасы А.А.Пластов музейінің тұрақты көрмесінің коллекциясы үшін сатып алынды, биыл суретші Суздаль қаласының мыңжылдығына пленэрге баруды жоспарлап отыр.
Суретші Украинада, Түркияда, Данияда, Венгрияда да жеке көрмелерін өткізген. ALMALINE шығармашылық тобының мүшесі. Алматы, Бішкек, Кипр, Стамбул, Будапешт қалаларындағы топтық көрмелердің қатысушысы. Суретшінің Алматыда жеке сурет галереясы мен «ARTEAST» багет шеберханасы бар.
Көрме 21 сәуірге дейін жалғасады.
