Сапасыз білім берген университеттерді қатаң реттеу принципі қолданылмақ

Бұл туралы ҚР Ғылым және жоғары білім министрі Саясат Нұрбек айтты.

Ведомствоның кеңейтілген алқа мәжілісінен кейін БАҚ өкілдерінің сауалына жауап берген министр жоғары оқу орындары лицензиясынан тек соттың шешімен айырылатынын қадап айтты, деп хабарлайды Almaty-akshamy.kz ҚазАқпаратқа сілтеме жасап. 

Ал, Конституцияға сәйкес, Үкімет те, атқарушы билік те соттың шешімін өзгерте алмайды.

«16 жоғары оқу орны лицензиясынан айырылды. Биыл 15 университет тексеруде тұр. Алайда 2023 жылдан бастап жоғары оқу орындарын мемлекеттік бақылау моделі өзгереді. Осылайша, жаңа реттеу саясаты енгізіледі. Біз бұл мәселені мұқият қарастырамыз. Университетті бұрынғыдай тез жабуға мүмкіндік болмайды. Себебі, заңдағы принцип өзгереді. Бірақ, бұл жұмысты жалғастырамыз. Президент нақты тапсырмалар берді. Оған қатысты саясат өзгерген жоқ. Сапасыз білім берген жоғары оқу орындарын қатаң реттеу принципі қолданылады», - деді Саясат Нұрбек.

Айта кетерлігі, Ғылым және жоғары білім министрлігінің мәліметінше, бүгінде бес жеке университетке қатысты сот процесі жүріп жатыр.