«Сандық әлемдегі қылқалам құдіреті»

интерактивті экспозициясының тұсаукесер өтті.

ҚР Мемлекеттік орталық музейінде Ұлыстың ұлы күні – Наурыз мейрамын тойлаудағы жаңа тұжырымдамаға сәйес, «Сандық әлемдегі қылқалам құдіреті» интерактивті экспозициясының тұсаукесері өтті.

Экспозицияның ашылу салтанатына қылқалам шеберлері, Қазақстан суретшілер одағының мүшесі, «Қазақстанның еңбек сіңірген қайраткері», «Парасат» орденінің иегері Алпысбай Қазығұлов, Ресей этнографиялық музейінің Кавказ, Орталық Азия және Қазақстан этнографиясы бөлімінің жетекшісі Л.Ф. Попова, О.Таңсықбаев атындағы Алматы сәндік-қолданбалы өнер колледжінің оқытушылары мен студенттері, музей қонақтары қатысты.

Екі ғасырлық тарихы бар Орталық музейдің қорында 273 мыңнан астам музейлік құндылық сақталған. Оның ішінде бейнелеу өнері коллекциясында он мыңға жуық көркем туынды жинақталса, 4723 сақтам бірлігін кескіндеме және графикалық жұмыстар құрайды. Осы коллекция негізінде алғаш рет келушілер назарына ұсынылып отырған тың жоба – интерактивті экспозицияда Орталық музейдің бейнелеу өнері коллекциясында шығармалары сақталған 52 қазақстандық суретшінің ішіндегі 10 қылқалам шеберінің бейнелеу өнерінің кескіндеме және графика бағытында орындалған этнографиялық тақырыптағы, сондай-ақ, пейзаж, портрет жанрындағы майлы бояу мен акварель техникасында орындалған 100 жұмысының сандық форматтағы көрсетілімі таныстырылды.

Интерактивті экспозицияның мақсаты – музей қорында сақталған бейнелеу өнері туындыларын, қазақстандық суретшілердің шығармашылығын насихаттау, олардың туындыларына қолжетімділікті қамтамасыз ету.