Нилуфар Раимова - әйелдер күресінен Азия чемпионатының қола жүлдегері
Белдесу барысында қазақстандық балуан жинақы қимыл көрсетті
Бүгін, 12 сәуірде, Астана қаласында әйелдер күресінен Азия чемпионатының екінші ойын күнінде Нилуфар Раимова (57 келі) қола алды, деп хабарлайды Almaty-akshamy.kz ҚазАқпаратқа сілтеме жасап.
Ол 3-орын үшін сайыста қырғызстандық Бермет Нуридинқызымен кездесті. Белдесу барысында қазақстандық балуан жинақы қимыл көрсетті. Нәтижесінде қарсыласынан 7:0 есебімен басым түсті.
Сондай-ақ, бүгін ел құрамасынан Жәмила Бақбергенова (72 келі) жапониялық Сумире Никурамен алтын жүлдені сарапқа салады.
Ал Альбина Қайыргелдинова (65 келі) қола жүлдеге таласады. Қарсыласы - үндістандық Маниша Маниша.
Еске салсақ, әйелдер күресінен жарыстың алғашқы күнінде ел құрамасынан Эльмира Сыздықова (76 келі) чемпион атанса, Марина Седнева (55 келі), Елена Шалыгина қола алды.
