Қазақстандағы 100 некенің 13-і Алматыда тіркелген
Жалпы, елімізде бір жылда некелер саны 9%-ға өссе, ажырасулар саны 14%-ға азайған.
2021 жылғы қаңтар-желтоқсанда елімізде 140,3 мың неке тіркелді, бұл бір жыл бұрынғыдан 8,9%-ға көп, деп хабарлайды Almaty-akshamy.kz Finprom.kz сайтына сілтеме жасап.
Қалаларда неке қиғандар саны бір жылда бірден 12%-ға, яғни 99,4 мыңға дейін өссе, ауылдарда небәрі 1,9%-ға, яғни 40,8 мыңға дейін көбейді.
2021 жылдың 12 айында ажырасулар саны 19,3 мыңды құрады, бұл бір жыл бұрынғы көрсеткіштен бірден 14,4%-ға аз. Қалаларда ажырасулар саны жылына 10,8%-ға, яғни 14,9 мыңға дейін, ауылдарда 24,5%-ға, 4,4 мыңға дейін азайды.
Жұптардың көбі былтыр Алматы қаласында тіркелген. Оңтүстік астанада 18,8 мың неке тіркелген, бұл бір жыл бұрынғыдан 18,8%-ға көп.
Үздік үштікке сонымен қатар халқы тығыз орналасқан Алматы (14 мың, плюс жылына 7,9%) және Түркістан (13,9 мың, плюс 3,2%) облыстары кірді. Некенің ең аз көрсеткіші Солтүстік Қазақстан облысында тіркелген: небәрі 3,5 мың, бірақ облыс үшін айтарлықтай жоғары көрсеткіш – жылына 19,9%-ға өскен.
Тіркелген ажырасу деректерінің де ең көп саны Алматы қаласында (2,6 мың), Алматы облысында (2 мың) және Қарағанды (1,9 мың) облыстарында, ең азы – Қызылорда облысында (барлығы 437) тіркелген.
Елімізде неке қию көрсеткіші 1000 адамға шаққанда 6,78-ден 7,29-ға дейін өсті. Некенің ең жоғары көрсеткіші елордада тіркелген: 1000 адамға 9,66. Үздік үштікке Алматы қаласы мен Атырау облысы да кірді.
Ажырасу көрсеткіші, керісінше, 1000 адамға шаққанда 1,18-ден 1-ге дейін төмендеді. Өңірлік тұрғыдан алғанда Павлодар, Солтүстік Қазақстан және Қарағанды облыстарында бұл көрсеткіштің аз екені байқалды.
