Қадыр Мырза ӘЛІ: Пенде – кемшіліктен кенде болмайды
Адам болсаң, адал бол,
Жігіт болсаң, жайсаң бол!
***
Ер-азамат Елі үшін туады,
Елі үшін өледі.
***
Азаматтың асылы –
Арыстанның нәсілі.
***
Жігіттің екі айтқаны – бір өлгені.
***
Ер жігіт не үйінде, не үйірінде.
***
Арыстан ізінен,
Азамат сөзінен жаңылмайды.
***
Түк шықпаған адамнан бәрі шығады.
***
Кемеңгердің құдіреті кішіпейілділігінде.
***
Үлкендіктің басты белгісі – кішілік.
***
Сүрінбейтін жүйрік жоқ,
Жаңылмайтын жігіт жоқ.
***
Үміт қанша жасаса,
Адам сонша жасайды.
***
Ең бастысы ұмытпа:
Өмір барда – үміт бар.
***
Адам аяғынан тозады,
Құлағынан азады.
***
Салиқалы ақыл сақалдан,
Бірақ сақалдың айтқаны бола бермейді.
***
Ақыл сақалды сыйлайды,
Бірақ сиынбайды.
***
Сақал қымбат,
Бірақ Бас үшін ол да құрбан.
***
Періште пендені түзей алмайды,
Пенде періштені бұза алады.
***
Пенде – кемшіліктен кенде болмайды.
***
Өз бағасын өзі жақсы білетін адам
Саудаласпай-ақ сарыла салады.
***
Ағаш тамырсыз,
Адам Тәңірсіз болмайды.
***
Жетесіз ақылы
Адам да мақұлық.
***
Алтын болып не керек?
Алтынға бола бұзылып не керек?
Адамға адам болу жетпей ме?!
***
Адамның жаны ішінде,
Жанары сыртында.
***
Адамзат опат болса,
Артында тек ақымақтар ғана қалады.
***
Адамдармен араласпасаң күн көре алмайсың,
Аралассаң, күн көрсетпейді.
***
Адамзаттың жүз ұсақ пенделігін
Жасаған бір жақсылығы шайып кетеді.
***
Жақсы адамнан шарапат,
Жаманнан жарақат.
***
Адам боламын деген азамат
Адам болмай тынбайды.
***
Адам қызық:
Біреу емініп тұрады,
Біреу тебініп тұрады.
***
Бір адамның адам болғанын
Екінші адам қалап жарытпайды.
***
Адамның ең тыныш кезі
Құрсақта жатқан кезі шығар.
***
Тағдыр маған ыржиып қарады деп қателеспе,
Ол оның саған азуын көрсеткені.
***
Егер адам үндемесе,
Ол оның құпия жасағаны емес,
Жанын сақтағаны.
***
Әдетте адам өзіне өзі ұнамайды.
Сондықтан үнемі өзге рөлде ойнап жүреді.
***
Өзін өзі таба алмаған адам
Жоғалтып та жарытпайды.
***
Адамның алдыңғы екі аяғы қолға айналған.
Ол не үшін керек?
***
Адамдардың көпшілігі бірін-бірі жек көреді,
Өйткені бірін-бірі өте жақсы біледі.
***
Жақсы адам жанашыр келеді.
***
Ниеті түзу адамның жолы да түзу болады.
***
Бір қаптанбыз,
Бір саптанбыз,
Қасиетті құрсақтанбыз –
Ел деген үй ұстаймыз,
Бірақ та сыйыспаймыз.
***
Ешқашанда адамға теріс қарама,
Өйткені бетіңді әрі бұрсаң,
Көтің бері бұрылады.
***
Алтынның соңына түскен адамның құны
Алты-ақ тиын!
***
Адамгершілік алға сүйрейді,
Пендешілік кейін тартады.
***
Адам деген
Қырық қабат құрамы
Пенделіктен тұрады.
***
Өмір тұрған өрт:
Өртенесің, күйінесің!
***
Байсың, кедейсің.
Бәрібір салық төлейсің.
***
Адам бақытын қуып жете алмайды,
Қасірет-қайғы қыр-соңыңнан қалмайды.
***
Сыпайылықты сақтайсың,
Сонда да жұртқа жақпайсың.
***
Адамның жауы – адам.
***
Сен адамды түсінбейсің табанда.
Періште емес,
Сайтан жақсы одан да.
***
Қып-қызыл боп от жанады көзінде,
Кім-кімнің де жыны ұстаған кезінде.
***
Көмейден бәрі өтеді, бәрі өтеді,
Адамның түбіне ындын жетеді.
***
Түрлі-түрлі тілекпен
Пенделердің күні өткен.
Жақсылығы жарық та,
Жамандығы – түнектен.
***
Адамды көргенде бауырым екен деп қаласың.
***
Алтынды аса жақсы көретін адам
Адамды жақсы көре алмайды.
***
Адал және арам,
Екеуі де адам.
Жақсы және жаман,
Тағы да сол адам.
***
Арын төккен адам – бәрін төккен адам.
***
Ардагер болмай да адам бола аласың.
Алайда адам бола алмасаң,
Ардагер бола алмайсың.
***
Батыр да адам,
Пақыр да адам.
***
Өмір бақи қысылып,
Өмір сүреді кісілік.
***
Үйленген адамның өмірі қысқармағанмен,
Өмірбаяны қысқарады.
***
Адамның бағасы абыройында.
***
Адамның өмірі қиын болған сайын
Өмірбаяны бай болады.
***
Адамның алғашқы ұстазы – хайуандар.
***
Адам дегенде аузың талады,
Өйткені ол саяси-қоғамдық мақұлық.
***
Адамның азуы сұмдық өткір,
Көмейі одан да қауіпті.
***
Адамның басқа хайуандардан айырмашылығы не?
Ол жылайды және басқаларды жылата біледі.
***
Адамның тамыры
Тамұқтан нәр алады.
***
Адамзаттың құрамында қанша адам бар?
Меніңше, онша көп те емес.
***
Менделеев кестесінен табылмаған элемент қанша?
Адам бойындағы беймәлім қасиеттер одан да көп!
***
Адамның бітірген шаруасы – Адамның бағасы.
***
Адам десе кейде,
Көкке жетер төбең.
Адам бірақ кейде,
Айуаннан да төмен.
***
Лай суға үңіліп кейде бірдеңе көруге болады.
Адамның ішінде не болып жатқанын
біле алмайсың.
***
Адам өзінің кім екенін жақсы білмейді.
Білсе, жүрегі айныр еді.
***
Адамның күш-қуаты хайуандығында.
Осалдығы, өкінішіне орай, адамдығында.
***
Адамның бір өкпесі ақ,
Бір өкпесі қара.
***
Адам – жарты Құдай,
Жарты пенде.
***
Оқыған-оқымаған адамнан
Қара танымайтын қасқыр артық.
***
Адам – пластилин.
Қоғам одан не істеймін десе, соны істейді.
***
Бәленбай ғасыр, бәленбай дәуірді
Бастан кешкен адамзаттың бар болғаны осы.
Енді ол бұзыла түспесе, түзелмейді.
***
Адамға байлық керек.
Бірақ ол байып болғанша,
Адамдық ғайып болады.
***
Адамның сатылған күні –
Оның атылған күні.
***
Хайуан хайуан боп туып,
Хайуан боп өледі.
Адам періште боп туады,
Неге періште боп өлмейді?!
***
Адам болсаң өзің үшін,
Тап содан әулие болып жатқан жанды көрмедім.
