Депутат Шардара су қоймасын жедел тексеруді сұрады

Құдайберген Ержан Бас прокурордың атына депутаттық сауал жолдады.

Мәжіліс депутаты Құдайберген Ержан Шардара су қоймасында су тасқыны қаупі барын ескертті, деп хабарлады Almaty-akshamy.kz Halyq Uni-не сілтеме жасап.

Оның айтуынша, БАҚ-та Шардара су қоймасының толып кету және Сырдария өзенінің бойындағы елді мекендерді су басу қаупі туралы ақпарат жарияланып жатыр.

«Сайлаушылардан осы жөнінде хаттар да, қоңырау да келіп түсуде. Халық қорқып, үрейленіп отыр. Сардоба су қоймасының жойылуының салдары әлі ұмытылған жоқ. Олар Шардара су қоймасының одан бірнеше есе асып түсетінін жақсы түсінеді», - деді ол Бас прокурорға жолдаған депутаттық сауалында.

Құдайберген Ержанның айтуынша, «Шардара» су электр станциясының жұмысы жабдықтар мен құрылысқа теріс әсер ететін шекті нормадан асқан. Депутат Бас прокурор Берік Асыловтан нысанды тексеруді сұрады.

«Жағалауды бұзады және көпірлерді жуады. Бұл шаруалардың егістігінде жер асты суының көбеюіне әкеледі. Берік Ноғайұлы, сізден осы мәселелерді қатаң назарға алып, халық игілігін қорғау үшін тиісті шаралар қабылдауыңызды сұраймын, - деді депутат.

Айта кетейік, Шардара су қоймасы Түркістан облысында орналасқан. Қойманың жалпы сыйымдылығы – 5 млрд 200 млн текше метр.