Дәрігерлерді сабау әдетке айналып барады
Соңғы кездері дәрігерлерді ұру әдетке айналып барады
Әлеуметтік желіде дәрігерді ұрған видеолар көбейіп барады. Күні кеше Талғарда ашуға бой берген азамат әкесінің өліміне ақ халатты жанды кінәлап, ұрып құлатты. Онымен қоймай, әкесінің мүрдесін алып кетті. Артынша, құқық қорғау органдары әрекет етіп, ашуға берілген азаматтың жауапқа тартылатыны туралы айтты.
Ал бүгін Шымкент қаласындағы ауруханалардың бірінде тағы да дәрігерді соққыға жыққан видео тарады. Бұл жолы дәрігерлер жиналып, ашуға берілген азаматты ұстап сабырға шақырды. Әзірге мән-жай белгісіз.
Талай жанды өлімнен арашалап қалуға сеп болып жүрген осы сала мамандарына қатысты айтылатын сын да көп. Десек те, дәрігер де адам баласы. Олар күні-түні жұмыс істеп, мамандығына дақ түсірмеуге тырысып бағуда. Дүниені дүр сілкінткен пандемия кезінде дәрігердің бір жылы сөзіне зар болып едік. Енді міне, сол жандарға қол көтеруге барып жатырмыз. Неге?
Естеріңізде болса, осы жылдың 28 сәуірінде Түркістан облысында жедел жәрдем қызметкерін соққыға жыққаны туралы ақпарат тараған еді. Полиция мәліметінше, тәртіп сақшылары науқас адамның шақыртуы бойынша жолда кетіп бара жатқан жедел жәрдем көлігіне көпірде жеңіл көлік иесінің жол бермегенін анықтаған. Соның кесірінен жүргізушілер арасында жанжал туындап, жедел жәрдем қызметкері дене жарақатын алған болатын.
