Ауылға барам, бәрі де туыс ел жақта...
Дейтұрғанмен, бүгінде ауыл жұртшылығы қалада тұруға асық.
«Бүгінде Қазақстан халқының 40 пайызға жуығы ауылда тұрады. «Ауыл – ел бесігі» деп халқымыз бекер айтқан жоқ. Ауылдағы жағдайды жақсарта алмасақ – бәрімізге сын. Сол үшін мен ауылды дамыту мәселесі туралы Жарлыққа қол қоямын. Осы құжат арқылы Үкіметке ауылды дамытудың бес жылға арналған нақты жоспарын әзірлеуді тапсырамын. Үкімет ауылды дамытуға арналған барлық жобаны жүйелі түрде реттеп, жинақтауы тиіс. Содан кейін мақсатты түрде тиімді жұмыс жүргіземіз».
Бұл - Мемлекет басшысы Қасым-Жомарт Тоқаевтың 2022 жылғы 26 қарашада Ұлықтау салтанатынан кейін сөйлеген сөзінен. Онда Президент өзінің жаңа президенттік мерзімдегі бірінші Жарлығын ауылға арнап, дәл сол күні «Қазақстанның ауылдық аумақтарын дамытудың 2023-2027 жылдарға арналған тұжырымдамасы туралы» Жарлыққа қол қойған болатын.
Мемлекет басшысы ауылды гүлденту мәселелеріне президенттік алғашқы мерзімінен бері ерекше назар аударып келеді.
Дегенмен, ауыл халқы қалаға қарай көшуге бейім. Қазіргі уақытта еліміздің ауылдарында 7,5 миллионнан астам адам тұрады.
Ұлттық статистика бюросының мәліметінше, бұл – ел халқының 38,2%-ы.
Урбанизация қарқынына байланысты соңғы жылдары ауыл халқының үлесі азайып келеді. Егер 2022 жылдың басында ауылдардағы халық саны 7 728 176 адамды құраса, 2023 жылдың басында бұл көрсеткіш 7 556 745 болды. Оның ішінде 3 832 903 – ерлер, 3 723 842-әйелдер.
Ауыл тұрғындарының саны жағынан Түркістан облысы алда, ондағы ауылдықтар саны – 1 599 909 адам. Екінші орында Алматы облысы – 1 262 161 адам, үшінші орында Жамбыл облысы – 691 179 адам. Одан кейін Қызылорда облысы – 442 423 және Маңғыстау облысы – 420 052. Ауыл тұрғындарының саны Ұлытау облысында ең аз, онда облыс халқының 21%, яғни 46 328 адам тұрады.
Облыс халқының жалпы үлесінде ауылдықтар саны басым 7 өңір: Алматы, Жамбыл, Қызылорда, Маңғыстау, Солтүстік Қазақстан, Түркістан және Жетісу облыстары.
