Алматыда нанның бағасы тұрақты
Алматы қаласының наубайханаларында әлеуметтік нан өндіру үшін ұн қорының жеткілікті мөлшері бар. Бұл туралы Алматы қаласының кәсіпкерлік және инвестициялар басқармасы мәлім етті, деп хабарлайды Аlmaty-akshamy.kz.
«Нан бағасының өсуіне жол бермеу үшін «Азық-түлік келісім шарт корпорациясы» қорынан 38 мың тонна субсидияланған астық жеткізілуде (құны тоннасына 90 мың теңге). Бүгінде «Ақсай нан», «Алматыдан» және «Рузинан» наубайханаларына астық жеткізілді», - деп мәлімдеді басқармада.
Басқарманың мәліметінше, мегаполиске ай сайын 4 мың тоннадан астам астық жеткізіліп отыр.
«Субсидияланған астық есебінен қаланың нан-тоқаш комбинаттары ірі сауда желілерінде нанның бағасын бір бөлке үшін 80 теңге және «үй жанындағы» дүкендерде бір бөлке үшін 90 теңге бағасын бекітті», - деп нақтылады Алматы қаласының кәсіпкерлік және инвестициялар басқармасында.
