Алматылық медиктер әулеті «Мерейлі отбасы-2021» байқауында жеңіске жетті
Отбасы күні қарсаңында «Мерейлі отбасы» ұлттық байқауының лауреаттарын онлайн форматта марапаттау рәсімі өтті.
Рәсімнің ашылуында Қазақстанның Мемлекеттік хатшысы Қырымбек Көшербаев мемлекет Басшысы Қасым-Жомарт Тоқаевтың құттықтау сөзін оқып, өскелең ұрпақты тәрбиелеу және отбасылық құндылықтарды нығайтудағы байқаудың маңыздылығын атап өтті, деп хабарлайды Almaty-akshamy.kz.
- Біз әрбір қазақстандық отбасында келісім, бақыт және амандық атмосферасы орнағанын қалаймыз. Сондықтан да мен отбасылық саясатқа ерекше назар аударамын. Отбасы институты өскелең ұрпақтың бойында адамгершілік, парасаттылық, еңбексүйгіштік, патриотизм сияқты қасиеттерді қалыптастыруда үлкен рөл атқарады. Халқымыз қай кезде де үлкенді сыйлап, жастарды қолдап, оларға үлгі-өнеге көрсетеді. Жаһандану жағдайында біздің дәстүрлі рухани құндылықтарымыздың қазіргі қазақстандық қоғам өмірінің ажырамас бөлігіне айналуы маңызды. Бұған Отбасы күніне орайластырылған жыл сайынғы жалпыұлттық байқау айтарлықтай үлес қосуда, - делінген Президенттің құттықтауында.
Байқауға Алматының атынан дәрігерлер әулеті қатысты. Бұл отбасында осымен үшінші буын азаматтардың денсаулығын қорғау саласында еңбек етіп жатыр.
- Қазақстан Тәуелсіздігінің отыз жылдығы біздің отбасымыз үшін де ерекше. Менің ата-анамның шаңырақ көтергендеріне биыл 65 жыл толды, - дейді Алмагүл Ахметова.
Оның айтуынша, медицина олардың да отбасын құруына себеп болған. Жас қыз Құлсара Аймырза Ахметов жұмыс істейтін ауруханаға түскен. Аймырза аурухананы аралау кезінде сұлуға назары ауып, олардың арасында бірден сезім ұшқыны пайда болған.
-Менің ата-анамның әрқайсысының мұндай сезім ұшқынның өзіндік нұсқасы бар – әкем мұны әдеттегі температураның жоғарылауымен түсіндіреді, ал анам шекке аздап қызарғанын айтады. Бірақ бұл махаббат фактісі екенін жоққа шығармайды, - деп жымиды қызы Алмагүл.
Қазір Ахметовтар отбасында үш бала, бес немере және бес шөбере бар. Сонымен қатар, тіпті кейбір немерелері медицина жолын таңдауды шешкен.
- Біздің отбасымыздың басты ерекшелігі - бұл бірлік. Бізде отбасылық дәстүрлер көп, бірақ ең бастысы – жаңа жылдық үлкен дастархан басында жиналып, жоспарларымызбен, жетістіктерімізбен және жаңа мақсаттарымызбен бөлісу, – дейді Ахметовтар отбасының өкілі.
Айта кету керек, биыл байқауды өткізудің жаңа тәсілдері енгізілген болатын, соған сәйкес, енді жыл сайын әр өңірден 17 үздік отбасы анықталады. Ағымдағы жылы өңірлік конкурстық комиссияларға 2768 өтінім келген.
Жаңа ережелер бойынша өтінімдер тек отбасылардан ғана емес, ұйымдардан да қабылданды.
Мемлекет басшысының атынан лауреаттардың отбасыларына естелік сыйлықтар мен ақшалай сертификаттар табысталды.
Мақала «Семейные ценности» газетінің 11.09.2021 жылғы №109 санында жарияланған.
