Алматыда Борис Керімбаевты еске алды
Алматы қаласында «Унифай әмбебап жекпе-жек» түрінен жасөспірімдер мен жастар арасында ауған соғысының ардагері, полковник Борис Төкенұлы Керімбаевты (Қара-майор) еске алуға арналған республикалық турнир өтті.
Әмбебап жекпе-жектен ұйымдастырылған турнир - Ауған соғысы ардагері Борис Төкенұлының құрметіне өткізіліп отырған алғашқы жарыс. Батырымыз әскери қызметке өмірінің 35 жылдан астам уақытын берді. Оның ең қиын, әрі жауапты кезеңі Ауғанстанда өтті.
Ол Алматы облысының Қапшағай қаласындағы 22-ші арнайы мақсаттағы құрама базасында ұйымдастырылған 177-ші арнайы мақсаттағы жасақты басқарды. Бұл құрылым негізінен қырғыздардан, қазақтардан, өзбектерден және тәжіктерден құралған соң «мұсылман батальоны» деп аталатын.
Ауған соғысының ардагері, халық арасында «қара майор» атанып кеткен әйгілі полковник Борис Төкенұлы Керімбаевты еске алу турнирі Алматыдағы №4 мамандандырылған балалар мен жасөспірімдер спорт мектебінде өтті. Спорттық іс-шараның ашылу салтанатына ауған соғысының ардагерлері, қоғам қайраткерлері және бүкіл әлемдік сайыстарды еліміздің көк туын көтеріп жүрген спортшылар қатысты.
Осы орайда, алғашқы құттық сөзі Қазақстан Республикасының Ардагерлер қауымдастығының төрағасы, «Унифай әмбебеп жекпе-жек» федерациясының президенті Бахытбек Смағұлға берілді:
«Кеңес әскерлерінің Ауған жерінен шығарылғанына 35 жыл толуын елімізде атап өтуде. Осы орайда, спорттық іс шара Ауған соғысының қаһарманы, ҚР қарулы күштерінің аяққа тұруына үлкен еңбек сіңірген қолбасшы Борис Төкенұлының құрметіне ұйымдастырылып отыр.Ашылу салтанатына қара мойордың жасағы, бірге қызмет еткен ардагерлер қатысты. Ардагерлер мен спортшыларды арнайы марапаттау рәсімі өтті. Сайысты өткізудегі басты мақсатымыз даңқты батырымыздың жасаған ерлігін ұрпаққа өнеге етіп, насихаттау болып отыр. Сонымен қатар, жастардың арасында салауатты өмір салтын қалыптастырып, еліне деген махаббатырын арттыру», – деді Б.Смағұл.
Спорттық іс шара барысында ардагерлер мен әлем чемпиондары және спорт шеберлері Борис Керімбаев атындағы «Ар-намыс» төсбелгісімен марапатталды. Жалпы жарысқа еліміздің 7 өңірінен 270 астам спортшы қатысты. Сайыс ережесі бойынша 10-18 жас арасындағы спортшылар өз арасында шын мықтыны анықтады. Жарыс жеңімпаздары арнайы, бағалы сыйлықтармен марапатталды.
