Алматы облысының әкімі Өзбекстан елшісін қабылдады

Былтыр екі ел арасындағы тауар айналымы 167,8 миллион АҚШ долларын құраған.

Алматы облысының әкімі Марат Сұлтанғазиев Өзбекстан Республикасының Төтенше және Өкілетті Елшісі Саидикрам Ниязходжаевты қабылдады, деп хабарлайды Almaty-akshamy.kz

Жиын барысында агроөнеркәсіптік кешен, сауда, көші-қон және жастар саясаты саласындағы бірқатар мәселелер талқыланды.

«Біз үшін мемлекет басшыларының тату көршілік пен өзара сыйластыққа адалдығын көрсететін қарым-қатынасы үлгі бола алады. Азық-түлік кластері арқылы өзбек бизнесмендерімен аймақтық бизнес-форум өткізуге дайынбыз», – деді Марат Сұлтанғазиев.

Аймақ басшысының айтуынша, 2022 жылы Алматы облысы мен Өзбекстан Республикасы арасындағы тауар айналымы 167,8 миллион АҚШ долларын, оның ішінде экспорт – 110,8 миллион АҚШ долларын, импорт – 57,1 миллион АҚШ долларын құраған. Бүгінгі таңда облыстың негізгі экспорттаушылары сүт өнімдерін, кондитерлік және макарон өнімдерін шығаратын тамақ өнеркәсібі кәсіпорындары болып табылады.

Әкімнің айтуынша, егер біздің облыс өзбек диқандарынан ерте шыққан көкөніс пен жеміс-жидек өнімін сатып алса, күзге қарай Өзбекстан бізден ауыл шаруашылығы тауарларын алады.

Өз кезегінде Төтенше және Өкілетті Елші 2018 жылы Алматы және Ташкент облыстары арасында келісімдер болғанын және қазір келісімдерді жаңарту қажеттілігі туындап отырғанын, бұл ретте Өзбекстанның басқа облыстарының әкімдерімен де өңіраралық қатынастарды одан әрі дамыту үшін осыған ұқсас бірқатар іскерлік кездесулер өткізуге болатынын атап өтті.

Осыған байланысты елші Өзбекстанда өтетін бизнес-форумға Алматы облысынан делегация жіберуді ұсынды.

Кездесу барысында ЕАЭО мүмкіндігін ескере отырып, өңірге бизнесті тарту факторы болып табылатын Алматы облысының көлік-логистикалық әлеуеті талқыланды.

Сонымен қатар, Марат Сұлтанғазиев Саидикрам Ниязқожаевты өңірді одан әрі дамыту жоспарларымен таныстырды.

Кездесу соңында тараптар сауда-саттықты одан әрі арттыру мақсатында бизнес-қоғамдастықтың кездесуін өткізуге келісті.