Алматы мәслихатының депутаты көшеде түкіру мәдениетсіздігі жайлы ойын білдірді
Көшеде түкіру - мәдениетке жат әдет.
Алматы мәслихатының депутаты, белгілі қоғам қайраткері Сергей Пономарев көшеде, қоғамдық орындарды түкіру қала көркін бұзып қана қоймай, түрлі бактериялардың таралуына әкелуі мүмкін деп санайды, деп хабарлайды Almaty-akshamy.kz
«Алматыға келген шетелдік туристер ең алдымен нені көреді? Әрине, тауды көреді. Бірақ оны басыңды көтерген кезде көресің, ал төмен түсірсе ше... асфальт бетіндегі қақырық-түкіріктер. Бұл туралы жиі айтылады, көбінесе күнделікті өмірде айтып жатамыз, мәдениетті болуға шақырып жатамыз. Бірақ адамдар автокөлік, автобус терезесінен, көшеде отырған орынтарды отырып, балалар алаңдарында, тіпті жаяу жүріп бара жатып түкірулерін доғармайды. Мәдениетсіздікке жататын бұл әдет жиіркенішті ғана емес, денсаулық үшін қауіпті!» – деп жазды ол әлеуметтік желіде.
Эпидемиологтардың пікірі бойынша, түкірік көптеген ауруларға әкелуі мүмкін: тіпті кеуіп қалған адамның түкірігінде герпес, қызамық, туберкулез, гепатит, пневмония болуы мүмкін.
Бұған дейін Денсаулық сақтау министрі Ажар Ғиният та көшеде түкіруге тыйым салу ұсынысын қолдап, бұл әдетті «Бұл мәдениеттің төмендігін көрсетеді, бұл гигиенаға қайшы әрі жаман әдет» деген болатын.
Бұл мәселе тек Алматы мен елімізде ғана қатысты емес, басқа мемлекеттерде де кездесіп отыр.
Көршілес Қырғызстанда 2019 жылы қоғамдық орындарда түкіруге тыйым салатын жаңа Кодекс күшіне енген болатын. Осыған ұқсас әдепсіздікке қарсы күрес шаралары Үндістан, Қытай, Сингапурда да бар.
Депутат азаматтардың жаппай түкіру әдеті Қазақстанның мәдени астанасының мәртебесі мен туристік бейнесіне кері әсерін тигізеді деп санайды. Ол қоғамдық орындарда түкіргендерді қатаң жазалауды ұсынды.
«Мен депутат әріптестеріме және қалалық әкімдікке ұсынысым бар: қоғамдық орындарда өзін ұстаудың қосымша ережелерін дереу жасау керек, түкіруге ғана тыйым салмай, темекі тұқылын, қоқыс, шемішке, сағыз қалдықтарын тастауға да тыйым салып, оны заңнамалық деңгейде бекіту қажет. Осы мәселеге бейжай қарамайтын қала тұрғындарын бұл бастаманы қолдауға шақырамын, қаламызды сөзбен ғана жақсы көрмей, іспен де дәлелдейік!» – деп толықтырды Сергей Пономарев.
