Алаш арысына арналған жиын
Биыл Алаш көсемі, энциклопедист-ғалым Халел Досмұхамедұлының туғанына 140 жыл. Медицина, тіл ғылымы, т.б қоғамның кез келген саласында өлшеусіз із қалдырған Алаш арысының мерейтойын атап өту Жаңалық ауылындағы жиыннан басталды.
Арыс қорының ұйымдастыруымен Саяси қуғын-сүргін құрбандары музейінде «Ғибратты ғалым – Халел» атты дөңгелек үстел өтті. Іс-шараға алаштанушылар мен тарихшы-ғалымдар қатысып, Халел Досмұхамедұлының ұлт руханиятына сіңірген еңбегі туралы сөз қозғады. «Алаш арыстары» мешітінде марқұмның рухына Құран бағышталып, ас берілді.
«Бұл кісінің араласпаған саласы жоқ. Барлық саланың басында тұрған үлкен ағартушы десек артық айтпаймыз. Халел Досмұхамедұлының 150 жылдық мерейтойын әлемдік деңгейде атап өту жоспарда бар», - деді Арыс қорының президенті Ғарифолла Әнес.
24 сәуір күні ұлт-азаттық қоғалысы жетекшілерінің бірі, Батыс Алашорда үкіметінің жетекшісі болған Халел Досмұхамедұлының туғанына 140 жыл толды. Осыған байланысты Саяси қуғын-сүргін құрбандары музейінде халелтанушылар, алаштанушы-ғалымдарды шақырып, Алаш қайраткеріне арнап дөңгелек үстел өткіздік. Біздің музей репрессия құрбандарына арналғандықтан, ұлт үшін құрбан болған барлық тұлғаның мерейтойы немесе маңызды даталарды еске алу шараларын өткізіп тұруға тырысамыз. Биыл саяси қуғын-сүргінге ұшыраған Алаш қайраткерлері Шәкәрім Құдайбердіұлы, Мағжан Жұмабаев, Сұлтанмахмұт Торайғыров сынды біраз тұлғаның мерейтойы болғалы тұр. Алаш қайраткерлерінін бөлек, компартияның мүшесі болса да, қазақтың мүддесін қолдаған ұлт зиялыларымыз бар. Олардың бірі – Жанайдар Сәдуақасовтың 125 жылдығы. Одан бөлек Т.Жүргеновтің 125 жылдығы мерейтойлары осы музейде өтеді, - дейді Саяси қуғын-сүргін құрбандары музейінің меңгерушісі Мейіржан МҰСАБАЕВ.
