16 көшенің жарықтандыру тіректерінде энергия үнемдейтін LED шамдары орнатылды
Аудан тұрғындарды толғандыратын мәселелердің бірі көшелерді сыртқы жарықтандыру болып қала береді. Бұл жайында Алматы қаласының әкімі Е.Досаевтың Түрксіб ауданы тұрғындарымен кездесуінде мәлім болды, деп хабарлайды аlmaty-akshamy.kz.
Жарықтандыру желілеріне қызмет көрсету бойынша өкілеттіктер 2023 жылдың күзінен бастап аудандық әкімдіктерге берілді. Өткен жылдың қазан айында аудан әкімдігі «Алматы Қала Жарық» компаниясымен шарт жасасқан.
2023 жылдың қараша-желтоқсан айларында жөндеу бригадаларымен 520 өтінім пысықталып, 872 шам ауыстырылды, сондай-ақ 16 көшенің жарықтандыру тіректерінде энергия үнемдейтін LED шамдары орнатылды. Жалпы, 2024 жылдың соңына дейін аудан бойынша көше жарығын 85% - ға дейін қалпына келтіру жоспарлануда. 2025 жылы 100% - ға дейін жеткізіп, барлық көшелерді жарықтандыру жоспарлануда, деді қала әкімі Е.Досаев.
