Юрий Ильин: 285 елді мекенді су басу қаупі бар
Қазақстан бойынша 285 елді мекенді су басу қаупі бар. ҚР Төтенше жағдайлар министрі Юрий Ильин Үкімет отырысында осындай мәлімет берді, деп хабарлайды Аlmaty-akshamy.kz ҚазАқпаратқа сілтеме жасап.
Әуелі ол 2017-2020 жылдарға арналған су тасқыны қаупінің алдын алу және жою жөніндегі жол картасы шеңберінде 41,9 млрд теңгеге 402 іс-шара іске асырылғанын еске салды. Ал 2022 жылғы су тасқыны кезеңіне дайындық бойынша су тасқыны қаупі бар елді мекендерді қорғауды көздейтін 148 іс-шара қолға алынған. Айтуынша, соның арқасында 158 елді мекенді тасқыннан қорғау артпақ.
«Жалпы, су тасқынына қарсы іс-шаралар кешенін іске асыру 340 елді мекеннен су басу қаупін алып тастады және 385 елді мекенде қауіп барынша азайтылды. Бүгінгі күні су тасқыны қаупі бар 1010 елді мекеннің 285-і үшін қауіп сақталуда», - деді Юрий Ильин.
Оның мәліметі бойынша, елдің таулы аймақтарында мұздықтардың қарқынды еруі де тасқын қаупін жоғарылатып отыр.
«Біз каналдарды тазалау, жарылу қаупі бар 17 мұздақ көлде сифондар орнату сияқты алдын алу іс-шараларын жүргіздік», - деді министр.
