Қазақстанға бір туристен қанша табыс түседі?
Әр шетелдік турист 2 жұмыс орнын ашуға сеп болады.
Қазақстанға алыс шет елден келген әрбір турист орта есеппен 1500 доллар табыс әкеледі, деп хабарлайды Almaty-akshamy.kz Мәдениет және спорт министрлігінің баспасөз қызметіне сілтеме жасап.
Былтыр туристік қызметтерден ел қазынасына рекордтық 389 млрд теңге салық түскен.
Ұлттық банктің дерегіне сәйкес Қазақстанға алыс шет елден келген 1 турист орта есеппен 1500 доллар мөлшерінде табыс әкеледі.
"Елімізде соңғы екі жылда туризм саласында жұмыс істейтіндердің саны айтарлықтай өсіп, 500 мыңға жуықтады. Мәдениет және спорт министрлігі 2029 жылға дейін туризм саласында 800 мыңға жуық адамды жұмыспен қамтуды жоспарлап отыр",- деді мәдениет және спорт вице-министрі Ержан Еркінбаев.
Министрліктің ақпаратынша, былтыр елімізге 1 миллионға жуық шетелдік турист келген. Нәтижесінде туристік қызметтен түскен салық мөлшері 389 миллиард теңгеге дейін жетіп, рекордтық нәтиже тіркелді. Оның ішінде еліміздегі орналастыру орындары 183 млрд теңге табыс тапты.
