Қазақстандықтарға 175,8 млрд теңгеден астам жәрдемақы төленді
Әлеуметтік жәрдемақының орташа мөлшері – 52 318 теңге.
Қазақстан Үкіметі жыл басынан бері жәрдемақыға мұқтаж мемлекет азаматтарына 175,8 млрд теңгеден астам қаражат төледі, деп хабарлайды Almaty-akshamy.kz.
«1 маусымдағы жағдай бойынша, қазақстандықтарға мүгедектік және асыраушысынан айырылу бойынша 175,8 млрд теңгеден астам қаражат төленді. Оның ішінде 2022 жылдың мамыр айында республикалық бюджеттен мүгедектік бойынша мемлекеттік әлеуметтік жәрдемақы төлеуге 27,7 млрд теңге, асыраушысынан айырылуына байланысты жәрдемақы төлеуге 8,2 млрд теңге жұмсалды», - делінген Еңбекмині баспасөз қызметінің хабарламасында.
2022 жылғы 1 маусымдағы жағдай бойынша, мүгедектік бойынша мемлекеттік әлеуметтік жәрдемақы алушылардың саны 528,9 мың, асыраушысынан айырылу жағдайы бойынша 180,1 мыңға жетті.
Мүгедектік және асыраушысынан айырылу жағдайы бойынша мемлекеттік әлеуметтік жәрдемақылардың мөлшері мүгедектік тобына және себебіне, қайтыс болған (қаза тапқан) асыраушының асырауындағы адам санына, сондай-ақ тиісті қаржы жылына арналған «Республикалық бюджет туралы» заңда белгіленетін ең төменгі күнкөріс деңгейіне байланысты болады.
2022 жылғы 1 маусымдағы жағдай бойынша, мүгедектік жөніндегі мемлекеттік әлеуметтік жәрдемақының орташа мөлшері – 52 318 теңге, асыраушыдан айырылу жағдайы бойынша төленетін жәрдемақы – 45 906 теңге.
