Қазақстанда су тасқынына қарсы іс-шаралар жалғасып жатыр
Ағымдағы тәулікте өңірлерде тұрғын үйлерді су басуға жол берілген жоқ.
Қазақстанның төтенше жағдайлар жөніндегі мамандары су тасқынына қарсы шараларды жүзеге асырып жатыр, деп хабарлайды Almaty-akshamy.kz.
«Қазіргі уақытта Ақмола және Ақтөбе облыстарындағы облыстық маңызы бар жолдардың 4 учаскесінде, Қарағанды, Ақмола, Ақтөбе, Қостанай облыстарындағы жергілікті маңызы бар автожолдардың 11 учаскесінде, Ақтөбе облысының жергілікті маңызы бар учаскесіндегі бір көпірде су тасқыны болып жатыр», - делінген Төтенше жағдайлар министрлігінің баспасөз қызметінің хабарламасында.
Ақмола, Ақтөбе, Қарағанды облыстарында, Нұр-Сұлтан қаласында жергілікті атқарушы органдар мен ТЖМ күштерімен аула аумақтары мен көшелерден 126,6 мың текше метр еріген қар суы сорылды. Ақмола, Шығыс Қазақстан, Ақтөбе, Қарағанды облыстарында инертті материалдары бар 4 895 қап төселді.
Жұмыстарға ТЖМ, ІІМ, жергілікті атқарушы органдардан, үкіметтік емес ұйымдардан 657 адам, 156 бірлік техника, 74 су сору құралы және 5 жүзу құралы жұмылдырылды.
Ақмола және Шығыс Қазақстан облыстарында су тасқынына қарсы іс-шараларға (қаптар төсеу, топырақ үйіп бекітілген жерлерді нығайту, еріген қар суын сору) ТЖМ 52859 және 68303 әскери бөлімдерінің 55 адамы мен 6 бірлік техникасы тартылды.
