Қазақстанда кітап оқу сайысы басталды

Байқаудың басты жүлдесі – Ыстанбұлға саяхат.

Қазақстан баспасөз клубында «Тұлға болам» атты үшінші кітап оқу сайысы басталды, деп хабарлайды Almaty-akshamy.kz Almaty.tv сілтеме жасап.

«Шұғыла» қоры, сондай-ақ «Дария» дамыту орталығының ұйымдастыруымен өтетін сайыс 3 кезеңнен тұрады. Мұнда мектеп оқушыларымен қатар ересектердің де бақ сынау мүмкіндігі бар.

9 сәуірге дейін жалғасатын байқаудың басты жүлдесі – Ыстанбұлға саяхат. Одан бөлек, техникалық және ақшалай сыйлықтар қарастырылған.

Айта кетейік, өткен маусымның жеңімпазына Нұр-Сұлтан қаласынан 1 бөлмелі пәтер берілген еді.  

«Талаптарына келсек, «Дария даму» қосымшасынан тіркелуге болады немесе «Тұлға болам.кз» сайтына кіріп тіркелуге болады. Мынадай үш талабы бар: аты-жөніңізді жазасыз, өзіңіздің мекенжайыңызды, яғни тұрғылықты жеріңізді көрсетесіз, қай сыныпта оқисыз немесе ересексіз бе, соны жазасыз. Қатысушы біз берген кітапты оқиды. Бір айда бір кітап береміз, содан соң сол кітаптан өзінің жасына қарай сұрақтар беріледі. Жүз немесе елу сұрақтан тұрады. Оларға біз қойған уақытта жауап беру керек», - деді жобаның демеушісі Сырымбек Тау.