Қазақстанда баспанаға деген сұраныс жоғары

Қайталама нарықтағы үй бағасы сол күйінде қалуы мүмкін.

Қазақстан риэлторларының біріккен қауымдастығы президентінің кеңесшісі Нина Лукьяненко тұрғын үй нарығындағы ахуал туралы пікір білдірді, деп хабарлайды Аlmaty-akshamy.kz ҚазАқпаратқа сілтеме жасап.

«Мәмілелер жеткілікті әрі тұрақты көлемде жасалып жатыр. Қазақстан бойынша ай сайынғы мәмілелердің жалпы саны 35 мың деңгейінде қалады деп болжауға болады. Айырмашылық 2-3 мыңның көлемінде», - дейді Нина Лукьяненко.

Сарапшы жылжымайтын мүлікке сұраныс айтарлықтай жоғары екенін айтады.

«Біздің елде тұрғын үйге деген сұраныс жоғары болып қала береді - халықтың табиғи өсімі мен көші-қон қарқыны оң», - дейді ол.

Маман қайталама нарықтағы жылжымайтын мүлік ұсыныстары жоғары болғандықтан, оның бағасы көтерілмейді деп болжайды.

Ал бастапқы нарықта ұсыныс азаюы мүмкін.

«Жаңа жобалар санының айтарлықтай төмендеуі, сондай-ақ құрылыс материалдарының қымбаттауы бастапқы нарықта тұрғын үй бағасын көтеруі мүмкін. Сату бөлімдерінде үлкен кезек болмағандықтан, құрылыс компаниялары түрлі акцияларды ұсынып жатыр», - деп түсіндірді Нина Лукьяненко.

Ұлттық статистика бюросының мәліметіне сүйенсек, 2022 жылғы қарашадағы жағдай бойынша, қайталама нарықтағы пәтерлердің бағасы 12 айда 26,9%, жаңа тұрғын үйдің бағасы 17,3% өскен. 2022 жылдың қарашасында көп қабатты тұрғын үй жалдау ақысы өткен жылмен салыстырғанда 48,6%-ға артқан.