Банк секторының жаңа тынысы ашылды
SDN тізімінен шыққан Bereke Bank Swift жүйесіне қайта қосылды. Енді мемлекеттік Bereke Bank клиенттері B-Bank мобильді қосымшасында SWIFT халықаралық аударымдарын АҚШ долларымен және еуромен қайтадан жасай алады. Демек, халықаралық аударымдарда еш шектеу жоқ. Осылайша ВТБ-ны есептемесек, Қазақстанның банк секторы тұтас санкциядан шықты.
Доллармен және еуромен онлайн аударымдарын іске қосу Bereke bank-тің операциялық қызметті қалпына келтіру жоспарлы жұмысы шеңберінде орындалған кезекті қадамы болды. Енді соңғы саты – Visa және Mastercard халықаралық төлем жүйелері бойынша картадан картаға жасалатын ақша аударымдарын қалпына келтіру болып отыр. Бұл Қазақстанның банк секторы үшін жақсы жаңалық.
Қазақстан Үкіметі санкцияға ұшыраған СберБанк конгламератының біздегі банкін сатып алып, оның атын ауыстырып, АҚШ-тың санкция тізімінен шығарып алған болатын. Тура осындай күй кешкен біздегі Альфа-Банкты ЦентрКредит сатып алып, жұтып қойды. Тек ВТБ банк қана Қазақстандағы банкін сатпай, санкция режимінде жұмыс істеуге ыңғайлай бастады.
Елдегі барлық банк пруденциальды нормаларды сақтап отыр. Ал 2023 жылғы 1 маусымдағы жағдай бойынша банк секторы активтерінің көлемі 45,4 триллион теңгеге жетті. Бұл бір ай бұрынғы деңгейден 1,2%-ға жоғары.
Мамыр айындағы активтердің өсімі бойынша Shinhan Bank көш бастап келеді. Сол айда алты банк активтерінің төмендеуін тіркеген. Еуразиялық банк (-4,1%) және KZI (-3,4%) құлдырау бойынша көш бастады.
Несие портфелі немесе банктердің клиенттер қолындағы қазіргі несие көлемі 25,5 триллион теңгені құрап отыр. Тым тез өсіп жатқан банктер ішінен Freedom Bank-ті атап айтуға болады.
Маусым айының қортындысы бойынша осы жағымды тренд сақталуы тиіс.
«Аlmaty-akshamу», №86, 20 шілде, 2023 жыл
