Алматылық дәрігерлер науқастың бас миына күрделі отаны сәтті жүргізді
Алматыда дәрігерлер науқастың бас миына жоғары технологиялық операция жасады
Орталық қалалық клиникалық аурухананың неврология қабылдау бөлімшесіне ми қан айналымының жіті бұзушылығы күдігімен 1981 жылы туған пациент келіп түскен. ОҚКА баспасөз қызметінің берген мәліметтеріне сүйенсек, науқасты нейрохирург тексергеннен кейін оған ангиография КТ жүргізілген. Талдау нәтижелері бойынша, алдыңғы қосылған күре тамырының үзілген қапты аневризмасы анықталған, деп хабарлайды Almaty-akshamy.kz
Нейрохирург-дәрігер Ербол Макежанов шұғыл түрде жоғары технологиялық операция жасады. Яғни, қапты аневризманың ассистенция баллонымен эндоваскулярлы эмболизация жасалды, ол оның қайтадан үзілуін болдырмайды. Аталмыш операция аз инвазивтік емдеу әдісінде негізделген. Нейрохирург-дәрігердің айтуынша, эндоваскулярлы нейрохирургияның заманауи технологиялары бұл операцияларды бас сүйекті теспей жасау мүмкіндігін береді.
«Жамбас күре тамыры арқылы бүкіл ағзасы бойынша арнайы катетер салынып, аневризмаға енеміз де, онда арнайы спиральдарды орнатамыз, содан соң аневризма қан ағымынан жансызданып, осылайша қан құйылу қаупінің алды алынады. Мұндай жағдайда пациент жедел түрде хирургиялық араласуды қажет еткен. Ота сәтті өтті. Пациент жансақтау бөлімшесінде оянғаннан соң белсенді түрде шағымданған жоқ, ал, бұрыннан мазасын алған бас сақинасының ауруы толығымен жойылып, 10-шы тәулікте пациент неврологиялық бұзылусыз ауруханадан шығарылды», - деді Ербол Макежанов.
Айта кететіні, аневризманың үзілуі бас миына қан кету арқылы пациентті қатты асқынуға, оның ішінде, геморрогиялық инсультке, жүйке жүйесінің зақымдануына немесе өлімге дейін апарады.
