Алматыда веложолақтардың ұзындығы 2,5 есеге артады
Қала әкімі Бақытжан Сағынтаев «Алматы» ТА-дағы Akimat Live бағдарламасы барысында қалалықтардың сұрақтарына жауап беріп, велосипед инфрақұрылымын дамыту жоспарларымен бөлісті, деп хабарлайды almaty-akshamy.kz
Қалада 77,2 шақырым велоинфрақұрылымы абаттандырылды, оның 21,5 шақырымы - веложолақтар, 55,6 шақырымы - веложолдар. «Орбита» шағынауданынан Көк базарға дейін айналмалы үзіліссіз велобағыт жасалды.
Жол қозғалысына қатысушыларды қорғау және қауіпсіздігін қамтамасыз ету мақсатында веложолдарын жүріс бөлігінен ажырататын 2 мыңнан астам жол блокаторлары орнатылды.
Қазіргі кезде Алматы қалалық мобилділік басқармасы «Көлік және коммуникация ғылыми-зерттеу және жобалау институты» ЖШС-мен бірлесіп, қаланың Вело және жаяу жүргіншілер инфрақұрылымын дамыту стратегиясын әзірлеуде.
Стратегияның басты мақсаты – халықтың микромобилділігі мен салауатты өмір салтын насихаттау; баламалы көлік түрлеріне қолайлы жағдайлар жасау; экологиялық таза көлік түрлеріне көшу; тыныш және қосымша аймақтарды қамтитын вело желілерін қосу.
Қала тұрғындарының өтініштері бойынша Стратегияға балалар мен жасөспірімдерге велосипедпен көше бойымен қауіпсіз қозғалуды үйрету енгізілді.
Стратегияны іске асыру аясында 2030 жылға дейін 185 шақырымнан астам вело инфрақұрылымын абаттандыру және оның ұзындығын 2,5 есеге, яғни 262,8 шақырымға дейін арттыру жоспарланған. 2024 жылы - 190,9 шақырым, 2026 жылы - 223,6 шақырым, 2030 жылы - 262,8 шақырымға дейін.
Айта кетерлігі, AlmatyBike велотізбегі модернизациядан өтіп жатыр. Велопарк 1760 велосипедтен және 187 бекеттен тұрады. 480 велосипедке күрделі жөндеу жүргізілді, олар желіге шығарылды. 7 тамызға дейін қосымша 250 велосипедті жөндеу жоспарланған.
Осы жылы жүйеде қолданушыларға қызмет көрсету үшін жаңа AlmatyBike мобильді қосымшасы мен CRM жүйесін әзірлеу жоспарланып отыр. Бұл қолданушыларға онлайн режимінде AlmatyBike-те тіркелуге және сату бөлімдеріне бару қажеттілігін жоюға мүмкіндік береді.
Жүйеге 50 мыңнан астам қолданушы тіркелген. AlmatyBike қызметін шамамен 2,9 миллион рет қолданып, 6 миллион шақырымнан астам жол жүрілген. 2021 жылдың бірінші жарты жылдығында AlmatyBike қызметін 342 мың рет қолданып, 685 мың шақырым жүріп өтілді.
