Алматыда күйші-композитор Боранқұл Қошмағанбетұлының 100 жылдығы аталып өтті
Боранқұл Қошмағанбетұлының домбырасы - музей сахнасында.
Алматыда Мультимедиялық дәстүрлі музыка орталығында күйші-композитор Боранқұл Қошмағанбетұлының 100- жылдығына арналған «Боранқұл Қошмағанбетұлының домбырасы музей сахнасында» атты музыкалық кеші өтті, деп хабарлайды Аlmaty-akshamy.kz.
Аталмыш іс-шарада, Оңтүстік Қазақстан, Қаратау күйшілік мектебіне үлес қосқан күйші Боранқұл Қошмағанбетұлының домбырасын қабылдау рәсімі өткізілді.
Күйшінің 100 жылдығына орай «Кең жайлау» атты күйлер жинағы кітабының тұсауы кесіледі. Аталған кітапта күйшінің отыз екі күйі нотаға түсіріліп, әр күйдің алдында шығу тарихы жазылған. Сонымен қатар орындау ерекшелігін басты назарға ала отырып, күйлерді QR код арқылы тыңдауға мүмкіндік бар. Бұл кітапқа автор «Жекеме, батыр, жекеме», «Үкілімайдың анасын аңсауы», «Немере жұбанышы», «Ықылас туралы толғау», « Ешкілі таудың етегі» сынды күйлерді түсірген.
«Бүгінгі кеш, болашақ ұрпағымызға үлгі болары сөзсіз. Қазақ күйлері әлемнің назарын өзіне аударуда. Осы ретте, қазақ өнеріне өлшеусіз үлес қосқан тұлғаларымызды ардақтау біздің басты міндетіміз»,– дейді «Алматы қаласы музейлер бірлестігі» КМҚК директоры Ляззат Сағындықова.
Боранқұл Қошмағанбетұлы 1923 жылы Шу өңірінде дүниеге келген. 1944 жылы Жамбылдағы педагогикалық училищені бітіріп, 1944 жылы Талас ауданында мұғалім болған. 1952 жылы Шымкент қаласындағы мұғалімдер институн бітірген. 1952 жылы КПСС мүшесі болған. 1949 - 2006 жылдар аралығында әртүрлі мекемелерде қызмет атқарған.
