Алматыда инвесторларға «бір терезе» қағидаты бойынша қызмет көрсетіледі
Бұл туралы ӨКҚ брифингінде Алматы қаласы кәсіпкерлік және инвестициялар басқармасының басшысы Берік Солтанбаев айтты, деп хабарлайды almaty-akshamy.kz
Ол 2023 жылдың наурыз айынан бастап мегаполисте инвесторларға жан-жақты қолдау көрсететін құрылым бар екенін хабарлады. «Almaty Business Development Company» «Алматы қаласының бизнесті дамыту компаниясы» ЖШС-де қызметтерді «бір терезе» қағидаты бойынша алуға болады.
«Компания консультация беру, инвестициялық жобаларды сүйемелдеу, рұқсат құжаттарын алуға жәрдемдесу және әкімшілік кедергілерді азайту арқылы инвесторларға жан-жақты қолдауды уақытылы көрсетуге бағытталған», - деді Берік Солтанбаев.
Тиісті басқарма басшысы 2023 жылдың 6 айында негізгі капиталға салынған инвестиция 604,4 млрд теңгеге жеткенін атап өтті.
