Алматыда Ахмет Жұбановтың туғанына 117 жыл толуына арналған кеш өтті
Шараға композитордың ұрпақтары мен өнер қайраткерлері қатысты
Алматыдағы Мемлекеттік Орталық музейі Құрманғазы атындағы Қазақ Ұлттық халық аспаптар оркестрімен бірігіп, Қазақ КСР Халық артисі, Мемлекеттік сыйлықтардың лауреаты, композитор, дирижер Ахмет Қуанұлы Жұбановтың туғанына 117 жыл толуына арналған салтанатты іс-шара өткізді, деп хабарлайды Almaty-akshamy.kz.
Шара аясында қазақ музыка өнерінің көшін алға сүйреген бірегей тұлғаға арналған көрме ұйымдастырылып, өмірлік, шығармашылық және ғылыми-педагогикалық жолын баяндайтын құнды жәдігерлер қойылды. Олар өнер қайраткерінің ғылыми еңбектері, қолжазба партитуралары, марапаттары, жеке құжаттары мен домбырасы, фрак және дирижерлық таяқшасы сынды экспонаттар.
Салтанатты шара барысында Қазақстан Республикасы Мемлекеттік Орталық музейі директорының орынбасары Саров Сержан Бараханұлы, Құрманғазы атындағы Қазақ Ұлттық халық аспаптар оркестрінің директоры Қуанышев Медет Ермекқалиұлы, Құрманғазы атындағы Қазақ ұлттық консерваториясының профессоры, композитор, ҚР еңбек сіңірген қайраткері Далденбай Бейбіт Әбілұлы, Құрманғазы атындағы Қазақ ұлттық консерваториясының доценті, PhD докторы Бердібай Айжан Рахманқұловалар құттықтау сөз сөйледі.
Концерттік бағдарламада Құрманғазының, Ахмет Жұбановтың, Ғазиза Жұбанованың, Мұрат Сыдықовтың, Қуаныш Нүкішевтің шығармалары және қазақ халық әндері орындалды.
Құрманғазы атындағы Қазақ ұлттық консерваториясының вокалдық өнер кафедрасының студенттері, халықаралық байқаулардың лауреаттары Аружан Алпысбаева мен Шыңғыс Нұрғалиұлының өнері де көпшілікті сүйсінтті.
Шараға композитордың туыстары, ұрпақтары мен өнер қайраткерлері қатысты.
