Тоқаев таяу арада несие туралы ұсыныс жариялайтынын айтты
Елімізде көп адам несие алып, қарызға батып жүр.
Мемлекет басшысы Қасым-Жомарт Тоқаев жақын арада несиеге қатысты ұсынысын жария ететінін мәлімдеді, деп хабарлайды Almaty-akshamy.kz Ақордаға сілтеме жасап.
«Мен тағы бір күрделі мәселеге тоқталғым келіп отыр. Елімізде көп адам несие алып, қарызға батып жүр. Бұл мәселе мені де қатты толғандырады. Таяу арада мен осы мәселе бойынша ұсынысымды халыққа жариялаймын», - деді Президент Жетісу облысының жұртшылығымен кездесуінде.
Тоқаев мемлекеттік қызметшілерден әділ болуды талап етті.
«Шын мәнінде, әділдік болмаса, ешбір сала дамымайды. Халқымыз «Әділ істің – бәрі игі» деп бекер айтпаған. Құзырлы органдар, лауазымды тұлғалар шешім қабылдағанда, осыны әрдайым есте ұстауы тиіс.
Әділетсіз қабылданған шешім биліктің беделін түсіреді. Қоғамға іріткі салып, халықтың наразылығын тудырады. Сондықтан, ешқашан әділдіктен аттауға болмайды. Барлық мемлекеттік қызметшіден әділ болуды талап етемін. Сонда ғана біз берекелі қоғам, мықты мемлекет боламыз», - деді Мемлекет басшысы.
Айта кететін жайт, 20 қазан күні Қазақстан Президенті Қасым-Жомарт Тоқаев жұмыс сапарымен Жетісу облысына барды. Мемлекет басшысы сапар барысында өңір халқымен кездесті.
