KOKBÓRI инвестициялық монеталары таныстырылды
Әбілхан Қастеев атындағы ҚР Мемлекеттік өнер музейі мен Қазақстан Ұлттық банкінің ұйымдастыруымен «Қазақстанды монеталар арқылы таны» атты көрме ашылды.
Көрме еліміздің ұлттық валютасының енгізілгеніне 30 жыл толуына орай ұйымдастырылған. Бұл экспозиция Қазақстанның ұлттық валютасы айналымға енгізілген сәттен бастап шығарылған бірегей монеталарды ұсынды. Экспонаттар мәдени, саяси және тарихи сәттерді қамтиды. Бұл жәдігерлер көрермендерге қазіргі қоғамның өміріне әсер еткен бірегей тарихи оқиғалармен танысуға мүмкіндік береді. Монеталар көрермендерге халқымыздың мәдениетін, әдет-ғұрпын, салт-дәстүрін паш ете отырып, коллекциялық монеталарға қазіргі заман тұрғысынан жаңаша көзқарас танытатындай.
Егеменді жас мемлекеттердің қатарына қосылған еліміз бен халқымыз Ұлы даланың бай тарихының ұрпағы әрі мұрагері десек, қателеспейміз. Біздің жылнамамыз ержүрек көшпенділер, ежелгі сақтар дәуірінен, жартастарға алғашқы петроглифтерді қалдырған қолөнершілерден бастау алады. Бұл – әлемдік тарихтың орасан зор бөлігі.
– Сол заманнан бастап соғылған көне теңгелер бүгінгі күнге дейін жеткен. Олар көне дәуірдің сырын ашып қана қоймай, Ұлттық банк дизайнерлерін өткен дәуірлердің түсі мен рухын, сондай-ақ заманауи инновациялық технологиялардың күші мен мәнерлілігін бойына сіңіретін заманауи монеталарды жасауға шабыттандырды. Оларды пайдалану нәтижесі суретшілердің түпкі ойын толығымен жүзеге асыруға және монеталардың мәнерлілігі мен сұлулығына қол жеткізуге мүмкіндік берді, – дейді көрме жетекшісі Ақжігіт Нүсіп.
Көрмеде жаңа KOKBÓRI инвестициялық монеталары таныстырылды. Қазіргі уақытта инвестициялық монеталар нарығындағы жаһандық үрдістер дизайны айрықша коллекциялық және сыйға тартылатын монеталарға бағытталған. Осыған орай, Қазақстанның инвестициялық монеталар нарығын өзектендіру, оларды танымал ету және халықаралық нарықта ілгерілету мақсатында Қазақстан Ұлттық банкі ALTYN BARYS және KUMIS BARYS атты инвестициялық монеталарына ребрендинг жасады.
Жаңа KOKBÓRI инвестициялық монеталарында «Көшпенділердің қасиетті жануарлары – тотемдері» атты монеталар сериясының дизайн стилі пайдаланылған, олардың жоғары танымалдылығы қысқа мерзімде Қазақстанның «тотемдік» инвестициялық монеталарының өзіндік бірегей брендін жасайды.
