Қазақстанға 100 үздік оқытушы мен ғалым шетелден шақырылады
«Ғылыми-педагогикалық виза» берудің оңайлатылған тәртібі енгізіледі.
Қазақстанды өңірлік білім беру хабына айналдыру үшін шетелден 100 оқытушы мен ғалым шақырылады. Бұл туралы ҚР Еңбек және халықты әлеуметтік қорғау министрлігі көші-қон комитеті төрағасының міндетін атқарушы Ілияс Испанов айтты, деп хабарлайды Almaty-akshamy.kz ҚазАқпаратқа сілтеме жасап.
Спикердің айтуынша, Еңбек министрлігі басқа да құзіретті мемлекеттік органдармен бірлесіп, 2023-2027 жылдарға арналған Көші-қон саясаты тұжырымдамасын әзірлеген.
Оны 30 қарашада Үкімет қаулысымен бекітті.
«Жаңа тұжырымдама еліміздің көші-қон саласын реттеуге және экономика дамуын кадрлық жағынан қамтамасыз етуді көздейді. Оның аясында алдағы жұмыс барысы 3 блоктан тұрады, бірінші – елімізге білікті кадрларды келуін ынталандыру, екінші – шетелге шыққан біздің азаматтардың жұмысын реттеу немесе еңбек құқықтарын қорғауға бағытталған жұмыстар, үшінші – өңірлер арасындағы демгорафиялық теңсіздікті жоюға арналған жұмыстар болады», - деді Ілияс Испанов Орталық коммуникациялар қызметінде өткен баспасөз мәслихатында.
Елімізге ең тапшы мамандықтар бойынша 500 мықты маманды тарту үшін 7 бағытта жұмыс жүргізіледі.
Бірінші бағыт – Қазақстанды өңірлік білім беру хабына айналдыруды көздейтін білім иммиграциясы.
«Бұл бағыттағы жұмыс жоғары оқу орындарының профессор-оқытушылар құрамын күшейтуге және білім беру сапасын арттыруға арналған. Ол үшін 100 үздік оқытушы мен сұранысқа ие технологиялар бойынша ғалымдарды Қазақстанға тарту ұсынылады. Бұл мақсатта 10 жылдық «Ғылыми-педагогикалық виза» берудің оңайлатылған тәртібі енгізіледі. Соның негізінде Қазақстанда тұрақты тұруға ықтиярхат, кейіннен азаматтық алу мүмкіндіктері қарастырылады. Дәл осындай мүмкіндікті тапшы мамандықтар бойынша оқитын шетелдік студенттер арасынан магистранттар мен бакалаврларға да беру қаралады», - деп түсіндірді І. Испанов.
Сонымен бірге, инвестициялық виза берудің төменгі шегін 300 мың АҚШ долларына (шамамен 140 млн теңге) дейін азайту қарастырылған.
Осы санаттағы мигранттар үшін «Инвесторлық виза» енгізу ұсынылады.
Бұл виза елде тұруға, бизнесін тіркеуге, мүлікке иелік етуге, жұмыскер жалдауға, қаржы төлемдерін жасауға және олардың кәсіпкерлік қызметінен туындайтын өзге де операциялар жүргізуге толық мүмкіндік береді.
