Қараша айының басында өңірлерде 83 мың оқушыға арналған 85 жаңа мектеп ашылды

ҚР Оқу-ағарту министрлігі үш ауысымды, апатты мектептердің мәселесін шешу үшін жаңа оқушы орындарын пайдалануға беру бойынша жүйелі жұмыстар жүргізуде.

Қараша айының басында өңірлерде 83 мың оқушыға арналған 85 жаңа мектеп ашылды, деп хабарлайды Almaty-akshamy.kz.

Бұл туралы ҚР Оқу-ағарту министрлігінің баспасөз қызметі мәлімдеді.

Жалпы, осы жылдың соңына дейін түрлі қаражат көздері арқылы 132 мың орындық 154 мектеп, оның ішінде Білім беру инфрақұрылымын қолдау қоры есебінен 76 738 орындық 62 мекте пайдалануға беру жоспарлануда. Бұл 12 апатты және 29 үш ауысымды мектептің, 113 елді мекендегі оқушылар орнының тапшылығы мәселелерін шешеді.

Сондай-ақ «Жайлы мектеп» ұлттық жобасы да іске асырылуда. Биыл құрылысы басталатын 217 мектеп 2024 жылдың соңына дейін пайдалануға беріледі. Ұлттық жоба бірінші кезекте қалалар мен келешегі бар елді мекендерде жаңа үлгідегі мектептерді салуға, оқушылар мен педагогтерге жайлы әрі қауіпсіз орта қалыптастыруға, білім беру қызметінің сапасын арттыруға бағытталған.

Мемлекет басшысының тапсырмасы бойынша жалпы елімізде 740 мың оқушыға арналған 369 жайлы мектеп салу жоспарлануда.